Қазақстан мен Ресей мемлекеттік шекараны бекітті
Екі көрші мемлекеттің шекараны бекіткені туралы ақпарат таратқан "Дождь" телеарнасы "екі жақ Имашев газ-конденсат кенішін тепе-тең бөлісті" деп жазды.
Мәскеу мен Астана (қазір Нұр-Сұлтан) 2005 жылы мемлекеттік шекара туралы келісімге қол қойған. Сол уақыттан бері оны дилимитациялау және демаркациялау жұмысы басталған.
Екі мемлекеттің шекараны бекіткені туралы ақпарат Қазақстан президенті Қасым-Жомарт Тоқаевтың Омбыдағы 16-өңіраралық әріптестік форумына қатысып жатқан кезде пайда болды. Форум аясында Тоқаев Ресей президенті Владимир Путинмен кездесіп, екі басшы сауда-экономикалық қарым-қатынас мәселелерін талқылаған. Кездесу соңында Тоқаев пен Путин шекара маңы ынтымақтастығын дамыту, шекарадағы өткізу бекеттерінің жұмысы және өзге салаларға қатысты бірнеше құжатқа қол қойған.
Оқи отырыңыз: Қазақстан мен Ресейде президент келерде неге әбігерге түседі?
Қасым-Жомарт Тоқаев президент ретінде Ресейге осымен үшінші рет барып отыр. Қазақстанды 30 жылға жуық басқарған 79 жастағы Нұрсұлтан Назарбаев наурыз айында президенттіктен кеткеннен кейін президент болған Тоқаев бұдан бұрын Назарбаев белгілеген бағыт-бағдарды жалғастыратынын бірнеше рет қайталаған. Көрші Ресеймен тығыз қарым-қатынас орнатқан Қазақстан - Ұжымдық қауіпсіздік шарты ұйымы және Еуразия экономикалық одағына (ЕАЭО) мүше. Кейбір бақылаушылардың пікірінше, Ресей постсоветтік кеңістікте Мәскеу ықпалын күшейту үшін ЕАЭО-ны құрал ретінде қолданады.