Անցումային արդարադատության մոդելում դրված չէ պատժիչ նպատակը. Ռուստամ Բադասյան (տեսանյութ)

Կոռուպցիայի մասին խոսելիս՝ չպետք է պատկերացնենք վիճակ, թե Հայաստանում ընդհանրապես քրեական գործ չպետք է հարուցվի, ընդհակառակը՝ պետք է հայտնաբերվի, որպեսզի մենք խոսենք կոռուպցիայի դեմ արդյունավետ պայքարի մասին։ Այս մասին լրագրողների հետ զրույցում ասաց Արդարադատության նախարար Ռուստամ Բադասյանը՝ անդրադառնալով դիտարկմանը, թե խոսվում է կոռուպցիայի մասին, բայց ամեն շաբաթ քրեակատարողական հիմնարկներում արգելված իրեր են հայտնաբերվում:

«Արգելված իրերի, մասնավորապես, թմրանյութի հայտնաբերման շեշտակի աճ կա: Կարող եք դա անընդհատ տեսնել հայտարարություններում: Դա քրեակատարողական ծառայության, ազգային անվտանգության ծառայության, ոստիկանության սերտ համագործակցության արդյունքն է: Օրերս, օրինակ, փորձել են պարսատիկով մետանֆետամին տեսակի թմրամիջոց մտցնել քրեակատարողական հիմնարկ, բայց այդ փորձը ևս խափանվել է:   Պետք է  հասնենք նրան,  որ մի օր խոսենք իդեալական վիճակի մասին, երբ նույնիսկ նման փորձեր չեն լինի»,- ասաց նա:

Դիտարկմանը, թե Արդարադատության փոխնախարարը հայտարարել է, որ անցումային արդարադատությամբ ուսումնասիրվելու է 1998 թվականից մինչև 2018 թվականի գործերը, իսկ վարչապետ Նիկոլ Փաշինյանն ավելի վաղ, անցումային արդարադատության մասին խոսելիս, ասել էր, որ այն գործերում, որտեղ արյուն կա, չի ներվելու, իսկ այն գործերում, որտեղ արյուն չկա, գումարը վերադարձնելու են ու ներվեն, այսինքն՝ անցումային արդարադատության երկո՞ւ տեսակ է լինելու, Բադասյանն ասաց. «Ընտրված է անցումային արդարադատության այնպիսի մոդել, որով վեր են հանվելու նախկինում հիմնարար իրավունքի խախտման դեպքերը, անցումային արդարադատության մոդելում դրված չէ պատժիչ նպատակը: Այսինքն՝ պատժելու, հետապնդելու, քրեական գործեր հարուցելու նպատակ չի հետապնդելու, դա արված է նրա համար, որ, ի վերջո, հնարավոր լինի որոշակի գնահատական տալ ընտրությունների կեղծման կամ սեփականությունից զրկելու այն դեպքերին, երբ դրանք ակնհայտ ապօրինի են եղել, և մտածել տուժողների խախտված իրավունքները վերականգնելու մասին։ Դա կարող է լինել դրամական օգնություն տալու կամ այլ ձևով, օրինակ՝ իրավունքի խախտման համար պետության կողմից ներողություն խնդրելու»:

Մանրամասները՝ տեսանյութում: