Խոսել չի կարելի, լռե՛լ

ՄԱԿ-ում հայաստանյան ժողովրդավարության մասին բարձրագոչ հայտարարություններ հնչեցնող Նիկոլ Փաշինյանի Հայաստանում մարդու հիմնարար իրավունքների ու ազատությունների հետ կապված խնդիրները միմիայն շարունակում են խորանալ՝ այլևս ստանալով զազրելի դրսևորումներ:

Tert.am-ի հետ հարցազրույցում մեկնաբանելով որպես ցուցարար ներակայացած մի խումբ երիտասարդների կողմից այսօր «Հայելի» մամուլի ակումբի դեմ իրականացված հարձակումը՝ Անժելա Թովմասյանը աներկբա վստահություն  է  հայտնել, որ կատարվածի հետևում կանգնած են իշխանությունները, որոնց անմիջական հովանավորությամբ էլ տեղի է ունեցել ոտնձգությունը: Թովմասյանը կատարվածը հատկապես պայմանավորել էր Հայկ Հարությունյանի ինքնասպանության վերաբերյալ միառժամանակ առաջ  Hayeli.am-ում տեղ գտած հայտնի  հրապարակման փաստի հետ:

Տեղի ունեցածն իսկապես սոսկալի է: Ընդ որում՝ սոսկալի է փաստն ինքնին՝ անկախ այն հանգամանքից, թե զոհի կարգավիճակում տվյալ պահին որ լրատվամիջոցն է կամ որ ԶԼՄ-ի խմբագիրը, լրագրողը կամ տնօրենը:

Անշո՛ւշտ, գույներն է՛լ ավելի են խտանում, երբ նկատի է առնվում այն, թե հատկապես ով է հայտնվել այս ամենի թիրախում: Թիրախում հայտնվել է ընդդիմադիր հայացքներ ունեցող մի լրագրող, ում եղբայրը ոչ այլ ոք է, քան ՍԴ նախագահ Հրայր Թովմասյանը՝ հետհեղափոխական Հայաստանում ամենաշատը հետապնդված անձանցից մեկը:

Փաստորեն՝ եղբորը հետապնդելուն զուգահեռ իշխանություններն այժմ լծվել են քրոջ «աչքը վախեցնելու» գործին՝ ակնհայտորեն «պերսոնա նոն գրատա» հայտարարելով քույր և եղբայր Թովմասյաններին:

Հայաստանում ներքին իրավիճակն իսկապես աղետալի դրսևորումներ է ստանում, երկիրն ակնհայտորեն հայտնվել է ազատ անկման ռեժիմում, ինչը չի կարող իր խորքային ազդեցությունը չթողնել ողջ հասարակության կենսագործունեության վրա:

«Հայելի» մամուլի ակումբի դեմ հարձակում գործած տղաները, նկատենք, վարչապետ Փաշինյանի աջակիցներն են:

Փորձագիտական այն կարծիքներն ու տեսակետները, համաձայն որոնց՝ ԱՄՆ-ից վերադառնալուց հետո Նիկոլ Փաշինյանն անցնելու է չորրորդ իշխանությունն իրեն հնազանդեցնելու գործին, ցավոք, սկսում են հաստատվել: Աներկբա է, որ «Հայելիի» դեմ նման ցուցադրական ժեստի միջոցով Փաշինյանի իշխանությունը երկակի մեկնաբանությունների տեղիք չտվող ուղերձ է հղում ողջ դաշտին՝ պարտադրելով կա՛մ  հպատակվել ու շարունակել ապրել, կա՛մ  ենթարկվել մահապատժի:

Մյուս կողմից, իհարկե, առաջին պլանում է շարունակում մնալ կոնկրետ մեկ խնդիր՝ Սահմանադրական դատարանի նախագահ Հրայր Թովմասյանի հարցը: Մեծ է հավանականությունը, որ Թովմասյանի՝ պակաս սկզբունքային լինելու պարագայում կարող էր և «Հայելիի» դեմ հարձակում տեղի չունենալ, «բանը բանից չանցներ»: Աներկբա է, որ ոտնձգության հասցեատերը ոչ միայն Անժելա Թովմասյանն է որպես լրագրող, այլև հենց Հրայր Թվմասյանը: Ընդ որում՝ պակաս խոսուն չէ այն ժամանակահատվածի ընտրությունը, որի ընթացքում տեղի է ունենում այս միջադեպը. իշխանությունները խնդիր ունեն, որպեսզի իրենց կողմից հեղինակած ու գաղտնի քվեարկությամբ ԱԺ-ում  նոր-նոր «սղացրած» Սահմանադրական դատարանի դատավոր Հրայր Թովմասյանի լիազորությունների դադարեցման հարցի վերաբերյալ նախագծի ճակատագիրը չխեղաթյուրվի, ՍԴ-ն որոշում կայացնի այն վարույթ ընդունելու մասին, հանկարծ «ձվի մեջ մազ չփնտրի» նույնիսկ երբ դրանում «մազերի» պակաս առանձնապես չկա:

Ասել կուզի՝ սա շանտաժ է՝ ոչ միայն կոնկրետ լրատվամիջոցին կամ դրա տնօրենին, այլև ուղիղ Հրայր Թովմասյանին՝ հստակ ընթեռնելի ենթատեքստով:

Այն քաղաքական թիմը, որ հայտնվել է երկրի ղեկին, իր համար լուծում է լոկ մեկ գերխնդիր՝ Նիկոլ Փաշինյանի տոտալ գերիշխանության հաստատում ՀՀ սահմաններում: Դրան հասնելու համար այլևս միջոցների մեջ խտրականություն չի դրվում, ճիշտը սխալից, «թացը չորից» չի տարբերակվում, և թքա՛ծ, թե այդ ամենի արդյունքում ինչ վնասներ են կրում պետությունը, հասարակությունն ու ժողովրդավարական արժեհամակարգը:

Հայաստանում մեկ արժեհամակարգ կա՝ Նիկոլ Փաշինյանը:

Վարդգես Սարգսյան