Զինված ուժերի գործող սպաներ չեն ստացել իրենց հասանելիք բնակարանները. փաստաբան
Պաշտպանության նախկին նախարար, նախորդ խորհրդարանական ընտրություններում Հանրապետական կուսակցության համամասնական ցուցակը գլխավորած Վիգեն Սարգսյանի իրավախախտ գործողությունների հետևանքով տարիներով բնակարանների սպասող հայաստանցի զինվորականները զրկվել են իրենց հասանելիք անշարժ գույքից, փոխարենը, ինչպես պնդում է, փաստաբան Նորայր Նորիկյանը, ով քրեական այս գործում ներկայացնում է ութ տուժողների՝ բոլորն էլ գործող զինվորականներ, «պաշտպանության նախկին նախարարի հրամանին ծանոթանալուց անզեն աչքով երևում է, որ Երևան քաղաքում բնակարան են ստացել մարդիկ, ովքեր երբևէ բնակարանի կարիք չեն ունեցել, ովքեր 5 օր Երևանում չեն բնակվել, ովքեր այդ բնակարանները ստացել են գործող կարգերին ակնհայտորեն չհամապատասխանելու պայմաններում»:
«Այս քրեական գործի շրջանակներում միայն պաշտպանության նախկին նախարարին մեղադրյալ ներգրավելը ամբողջական չի։ Այս գործում լինելու են նաև այլ անձինք, որոնց արարքներին, բնականաբար, տրվելու է իրավական գնահատական։ Ես ուղղակի կարծում եմ, որ մենք մտնում ենք մի գործընթաց, որ իսկապես զինված ուժերում զինծառայողներին տարիներ շարունակ բնակարանային պայմանների բարելավման գործընթացում տեղի կունենա բեկում և մարդիկ, ովքեր տարիներ շարունակ անօրինական հովանավորչությամբ և տարբեր այլ ոչ իրավաչափ վարքագծի արդյունքում դեռևս շարունակում են սպասել իրենց բնակարաններին ու թեև այս ամբողջ գործընթացի արդյունքում ուղղակի հնարավորություն կստեղծվի, որպեսզի այդ մարդիկ ստանան իրենց բնակարանը», - ասաց փաստաբանը։
Քննչական կոմիտեի տարածած հաղորդագրության համաձայն, բավարար ապացույցներ են ձեռք բերվել պաշտպանության նախկին նախարար Վիգեն Սարգսյանին պաշտոնեական լիազորություններն անցնելու դեպքով որպես մեղադրյալ ներգրավելու համար:
Քրեական գործով հիմնավորվել է, որ կառավարության 2007 թվականի որոշմամբ և պաշտպանության նախարարի 2013 թվականի հրամանով բնակարանային պայմանների բարելավման կարիք ունեցող զինծառայողներին բնակարան տրամադրելու հարցի քննարկման լիազորությունը վերապահված է եղել պաշտպանության նախարարության կենտրոնական բնակարանային հանձնաժողովին, սակայն Երևան քաղաքի Հասրաթյան փողոցի 25/6 շենքի թվով 71 բնակարաններից 29-ի հատկացումների վերաբերյալ որոշում է կայացրել պաշտպանության նախարարը, ինչի հետևանքով նշված շենքի մի շարք բնակարաններ հատկացվել են կառավարության որոշմամբ սահմանված կարգի խախտմամբ, և էական վնաս է պատճառվել մշտական բնակմակերեսի կարիքավոր զինծառայողների իրավունքներին, վերջիններիս և պետության օրինական շահերին:
«Ազատությանն» առայժմ չի հաջողվել արձագանք վերցնել Վիգեն Սարգսյանից: