ეკონომიკის მინისტრი „თიბისი ბანკის“ დამფუძნებლების ანგარიშების დაყადაღებას კონკრეტულ პროექტებს არ უკავშირებს

არც ერთი სტატუსი, არც ერთი პოლიტიკური მოძრაობის შექმნის ფაქტი არ არის ინდულგენცია, არც ერთ ჩვენთაგანს არ ათავისუფლებს პასუხისმგებლობისგან, - ამის შესახებ საქართველოს ეკონომიკისა და მდგრადი განვითარების მინისტრმა ნათია თურნავამ ბიზნესმენ მამუკა ხაზარაძისა და ბადრი ჯაფარიძისთვის ანგარიშების დაყადაღების თაობაზე განაცხადა.


მინისტრის თქმით, რა ზომას გამოიყენებს გამოძიება კონკრეტული პირის მიმართ, ეს მხოლოდ გამოძიების პრეროგატივაა და ის ვერ დაეთანხმება, რომ ყადაღის გამოყენება „განპირობებულია რომელიმე კონკრეტულ პროექტში მონაწილეობით“.


„ჩვენ ვიცით, რომ მიმდინარეობს გამოძიება. პროცესი გამჭვირვალეა. რა ზომას გამოიყენებს გამოძიება და პროკურატურა, ეს სრულიად მათი პრეროგატივაა. ნამდვილად ვერ დავეთანხმები ვინმეს, რომ ეს არის განპირობებული რომელიმე კონკრეტულ პროექტში მონაწილეობით. არც ერთ პროექტში მონაწილეობა, არც ერთი სტატუსი, არც ერთი პოლიტიკური მოძრაობის შექმნის ფაქტი არ არის ინდულგენცია, არც ერთ ჩვენთაგანს არ ათავისუფლებს პასუხისმგებლობისგან“, - აცხადებს თურნავა.


TBC ბანკის ერთ-ერთი დამფუძნებელმა მამუკა ხაზარაძემ Facebook-ზე დაწერა, რომ მას და მის პარტნიორს, ბადრი ჯაფარიძეს ყველა საბანკო ანგარიში დაუყადაღეს. ხაზარაძის თქმით, მისი და ბადრი ჯაფარიძის ყველა საბანკო ანგარიშის დაყადაღება, ემსახურება, იმას, რომ გაჩერდეს მათ მიერ დაანონსებული საზოგადოებრივი მოძრაობა და ყველა მიმდინარე დასაფინანსებელი საქველმოქმედო და ბიზნეს პროექტი, მათ შორის ანაკლიის პორტის პროექტიც.


პროკურატურის განმარტებით, „სასამართლოს ხაზარაძის და ჯაფარიძის საბანკო ანგარიშებზე დანაშაულებრივი გზით მოპოვებული 16 664 000 დოლარის ეკვივალენტის ქონების დაყადაღების შუამდგომლობით“ მიმართეს.