ქართველი და აზერბაიჯანელი ექსპერტები საზღვრის შეუთანხმებელ მონაკვეთებს ათვალიერებენ
საქართველოს საგარეო საქმეთა სამინისტროს ინფორმაციით, 20 აგვისტოს ექსპერტებმა ტერიტორია დაათვალიერეს სოფელ ვახტანგისისა და დავით გარეჯის სამონასტრო კომპლექსის მიდამოებში.
ექსპერტებმა განიხილეს ორი ქვეყნის კომისიების პოზიციები მოცემულ მონაკვეთებზე და წარმოადგინეს თავისი ხედვები. საქართველოს ექსპერტთა ჯგუფმა ადგილზე განუმარტა აზერბაიჯანულ მხარეს თავისი პოზიცია საზღვრის გამავლობის შესახებ. მუშაობის შედეგები მიეწოდება კომისიების თავმჯდომარეებს შემდგომი განხილვის მიზნით.
მომდევნო დღეებში დაგეგმილია ანალოგიური სამუშაოების ჩატარება საზღვრის სხვა შეუთანხმებელ მონაკვეთებზე. ექსპერტთა შეხვედრის პირველი ეტაპი სავარაუდოდ, 23 აგვისტომდე გაგრძელდება, რის შემდეგაც დაიგეგმება დარჩენილი შეუთანხმებელი მონაკვეთების მონახულების მეორე ეტაპი.
საექსპერტო შეხვედრების დასრულების შემდეგ, თბილისში დაიგეგმება სამთავრობო კომისიების სხდომა, რომელიც სავარაუდოდ, სექტემბერში ჩატარდება.