ედგარს რინკევიჩსი: გუგუტიანთკარში უკანონო მოქმედება უნდა შეწყდეს

ლატვიის საგარეო საქმეთა მინისტრმა, ედგარს რინკევიჩსმა მხარი დაუჭირა საქართველოში ევროკავშირის წარმომადგენლობის განცხადებას, რუსეთის მხარდაჭერილი ცხინვალის დე ფაქტო ხელისუფლების მიერ სოფელ გუგუტიანთკართან ე.წ. საზღვრის გავლების შესახებ.


„ეს კიდევ ერთხელ უხეშად არღვევს საქართველოს სუვერენიტეტს და ტერიტორიულ მთლიანობას“ - წერს ტვიტერზე ედგარს რინკევიჩსი და დასძენს, რომ უკანონო ქმედება უნდა შეწყდეს.


რუსეთის საოკუპაციო ძალებს გორის მუნიციპალიტეტის სოფელ გუგუტიანთკართან 7 აგვისტოდან გაჰყავთ ე.წ. საზღვარი. ოკუპირებულ ტერიტორიაზე ექცევა სოფლის მცხოვრებთა ორი სახლი, მიწის ნაკვეთები, ხეხილის ბაღები და სარწყავი არხი.