Испанияда россиялик сайёҳ қизни номаълум кимсалар зўрлашди, калтаклашди. Аммо суд уларни озод этди…
Яқинда Испаниянинг Барселона шаҳар полициячилари икки нафар руминиялик эркакни қўлга олди. Улар билан бирга испаниялик қиз ҳам қамоққа олинди. Қизни икки эркакнинг шериги сифатида айблашди. Хуллас, бу икки эркак россиялик 26 ёшли сайёҳ қизни ўғирлаб кетиб икки кун давомида наркотик қабул қилишга мажбурлаган, калтаклаган ва номусига теккан. Қизнинг айтишича, фақат учинчи кунигина қочишга эришган. Аммо шунда ҳам катта йўл бўйидаги автобус бекатига етганда, наркотик таъсиридами, ҳушини йўқотган. Қизни ўткинчилар касалхонага ётқизишган.
Қарангки, айбдорлар қўлга олинган бўлса-да, суд жараёни бошланди-ю, уччаласини ҳам ўша ернинг ўзида гўёки вақтинча озод этишди. Эмишки, улар ҳар ҳафтада суд рўйхатидан ўтиб туришлари, шаҳардан ташқарига чиқмасликлари лозим эмиш. Жабрланувчи эса касалхонада муолажалар олмоқда. Маҳаллий ҳокимият вакиллари унга ҳар қандай турдаги ёрдамни беришга тайёр эканликларини айтишган.