Մշակութային Երևանը` ՌԴ մշակութային մայրաքաղաքում. ավարտվեց քաղաքապետի այցը Սանկտ Պետերբուրգ
ՌԴ հյուսիսային մայրաքաղաքում գտնվող Երևանի պատվիրակությունը պաշտոնական այցի երկրորդ օրը այցելել է Պիսկարյովյան հուշահամալիր` հարգանքի տուրք մատուցելու Լենինգրադի շրջափակման զոհերի հիշատակին: Այս հուշահամալիրում են գտնվում Բլոկադայի ժամանակ զոհված ավելի քան 420 հազար լենինգրադցիների և 70 հազար զինվորների 186 եղբայրական գերեզմանները: Քաղաքապետ Հայկ Մարությանը և Սանկտ Պետերբուրգի փոխնահանգապետ Աննա Միտյանինան պատվիրակության անդամների հետ միասին այցելել են նաև Պիսկարյովյան հիշատակի ճեմուղի, որտեղ ծաղիկներ են խոնարհել Լենինգրադի պաշտպանության ժամանակ իրենց կյանքը զոհաբերած հայորդիների հիշատակը հավերժացնող հուշաքարին: Երևանի քաղաքապետը նաև գրառում է կատարել պատվավոր հյուրերի հուշամատյանում:
Այնուհետ երևանյան պատվիրակության անդամները հարգանքի տուրք են մատուցել մեծ երգահան Կոմիտասի հիշատակին: Վարդապետի հուշարձանը Սանկտ Պետերբուրգի Վասիլեօստրովսկի (Վասիլեաստրո’վսկի) վարչական շրջանում տեղադրվել է Հայոց ցեղասպանության 100-ամյակի օրերին:
Երևանի օրերը նշելու ընթացքում Սանկտ Պետերբուրգում գտնվող Երևանի քաղաքապետ Հայկ Մարությանի գլխավորած պատվիրակությունն այցելել է Սուրբ Կատարինե հայկական եկեղեցի: 18-րդ դարի երկրորդ կեսին Պետերբուրգի հայ համայնքի ղեկավար, ականավոր գործիչ Հովհաննես Լազարյանի նախաձեռնությամբ և համայնքի նվիրատվություններով կառուցված տաճարն այսօր Սանկտ Պետերբուրգի հայերի մշակութային ու հոգևոր կենտրոնն է:
Մշակութային միջոցառումների շրջանակում Ա. Ա. Բրյանցևի անվան պատանի հանդիսատեսի թատրոնում կայացել է Նարինե Գրիգորյանի «Իմ ընտանիքն իմ ճամպրուկում է»
ինքնակենսագրական մենաներկայացումը: Հանդիսատեսը ներկայացման շնորհիվ ծանոթացել է արցախյան պատերազմի տարիներին հեղինակի մանկության պատմությանը:
Երևանի օրերի միջոցառումների ծրագիրը Սանկտ Պետերբուրգում ամփոփվել է Երևանի քաղաքապետի անունից կազմակերպված պաշտոնական ընդունելությամբ: Արարողությանը մասնակցել են Պետերբուրգի նահանգապետի ժամանակավոր պաշտոնակատար Ալեքսանդր Բեգլովը, կառավարության անդամներ, գիտության, արվեստի և մշակույթի գործիչներ, հայ համայնքի ներկայացուցիչներ: Պաշտոնական ընդունելության ժամանակ պետերբուրգցի բարերար Հրաչյա Պողոսյանը հանդիսավոր կերպով քաղաքապետ Հայկ Մարությանին է հանձնել Երևանի 2800-ամյակի դրոշը, որը 195 օր եղել է տիեզերքում` միջազգային տիեզերական «Միր» կայանում:
The post Մշակութային Երևանը` ՌԴ մշակութային մայրաքաղաքում. ավարտվեց քաղաքապետի այցը Սանկտ Պետերբուրգ appeared first on ԳԱԼԱ.