Ռուսաստանը սեղմում է օղակը. վրացական ավիաընկերությունների թռիչքները եւս կդադարեցվեն ՌԴ տարածքում

Վրացական ավիաընկերությունների թռիչքները Ռուսաստանի տարածքում կդադարեցվեն հուլիսի 8-ից: Այդ մասին ասվում է ՌԴ տրանսպորտի նախարարության տարածած հաղորդագրությունում: Նաեւ հայտնի էր, որ հուլիսի 8-ից ռուսաստանյան ավիաընկերությունները նույնպես պետք է դադարեցնեն օդային կապը Վրաստանի հետ:

ՌԴ տրանսպորտի նախարարության կայքում տեղադրված հաղորդագրությունում նշվում է, որ թռիչքների դադարեցման պատճառն օդային անվտանգության ապահովման անհրաժեշտությունն է եւ վրացական կողմի՝ ավիանավիգացիոն գործունեության մասով պարտքի առկայությունը:

Ընդհանուր առմամբ ավիանավիգացիոն սպասարկման մասով Վրաստանի պարտքը կազմում է մոտ 793 հզր ԱՄՆ դոլար: Պարտքի մի մասը չի վճարվել 2008թ.-ից սկսած:

Նշվում է, որ թռիչքները կդադարեցվեն այնքան ժամանակ, մինչեւ Georgian Airways եւ MyWay Airlines ավիաընկերությունները ռուսաստանյան կողմին  կներկայացնեն ավիացիոն անվտանգության ծրագրեր, նաեւ կկատարվի աուդիտ եւ կմարվի պարտքի ամբողջ գումարը:

Ավելի վաղ ՌԴ նախագահը հրամանագիր էր ստորագրել, ըստ որի հուլիսի 8-ից ռուսաստանյան ավիափոխադրողներին արգելվում էր դեպի Վրաստան թռիչքները, նաեւ պետք է ապահովվի այդ երկրում գտնվող ռուսաստանցիների անվտանգ վերադարձը հայրենիք:

Հիշեցնենք, որ Թբիլիսիում բողոքի զանգվածային ակցիաները սկսվել էին հունիսի 20-ին Վրաստանում անցկացվող միջխորհրդարանական վեհաժողովի նիստի ժամանակ ՌԴ պետդումայի պատգամավոր Սերգեյ Գավրիլովի ելույթից հետո, ով  նստել էր խորհրդարանի խոսնակի աթոռին և ռուսերեն էր արտահայտվել:

 

Աղբյուր՝ ՏԱՍՍ

Թարգմ.՝ Էդուարդ Մխիթարյան

The post Ռուսաստանը սեղմում է օղակը. վրացական ավիաընկերությունների թռիչքները եւս կդադարեցվեն ՌԴ տարածքում appeared first on ԳԱԼԱ.