Եթե Իրանում ներքաղաքական իրավիճակն ապակայունանա, Բաքուն կարող է միաժամանակյա պատերազմական գործողություններ նախաձեռնել ինչպես Արցախում, այնպես էլ Նախիջևանի կողմից. Արման Մելիքյան
Խնդիրն այն է, որ վրաց-ռուսական և իրանա-ամերիկյան հարաբերությունների միաժամանակյա կտրուկ սրացումը կարող է առաջիկայում մատակարարումների հարցում Հայաստանի համար լուրջ դժվարություններ առաջ բերել: Այս մասին Tert.am-ի հետ զրույցում ասաց ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանն՝ անդրադառնալով իր կողմից արված՝ «չի խանգարի պարենի ու վառելիքի գոնե եռամսյա երաշխավորված պաշար ամբարել» հայտարարությանը:
«Ես գիտեմ, որ ռազմավարական պաշարների ապահովման հարցը կարգավորվում է «Պետական նյութական պահուստի մասին» ՀՀ օրենքով և տեսականորեն անհրաժեշտ պաշարները Հայաստանում պետք է, որ լինեն, բայց հաշվի առնելով մի շարք սուբյեկտիվ և օբյեկտիվ գործոններ, անհրաժեշտ համարեցի ուշադրություն հրավիրել այս հարցի վրա: Կարծում եմ, որ գործող իշխանությունները պետք է նախ ստուգեն, թե արդյո՞ք այդ ռազմավարական պաշարներն իրոք առկա են պահեստներում և եթե առկա չեն, ապա շտապ քայլեր ձեռնարկեն դրանք ձեռք բերելու և ամբարելու համար»,- ասաց Մելիքյանը:
Հարցին՝ հնչեցված մտահոգությունը որքանո՞վ կապ ունի հարևան Վրաստանում և Իրանում տեղի ունեցող իրադարձությունների հետ, բանախոսը նշեց, որ վրաց-ռուսական հարաբերությունների վատթարացման պատճառով կարող են որոշակի սահմանափակումներ մտցվել Վերին Լարս սահմանային անցակետի գործունեության մեջ, ինչը խիստ բացասաբար կանդրադառնա դեպի Հայաստան և Հայաստանից Ռուսաստան իրականացվող բեռնափոխադրումների ծավալների վրա:
«Միևնույն ժամանակ, եթե իրանա-ամերիկյան հարաբերություններում առկա խորացող ճգնաժամը հանգեցնի Իրանում ներքաղաքական իրավիճակի ապակայունացմանն, ապա կարող են վտանգվել նաև իրանական ուղղությամբ իրականացվող բեռնափոխադրումները և այդ դեպքում մենք առնվազն ժամանակավորապես կհայտնվենք համարյա կատարյալ շրջափակման մեջ: Շրջափակումը համեմատաբար անկորուստ վերապրելու համար իմ կողմից մատնանշված նվազագույն պաշարները պետք է ապահոված լինենք»,- հայտարարեց նա և հավելեց.
«Այսօրինակ շրջափակման մեջ հայտնված Հայաստանի և Արցախի հանրապետությունները, չունենալով սեփական կենսապահովման համար անհրաժեշտ պաշարները, կարող են դիտարկվել որպես ադրբեջանական կողմի՝ համեմատաբար փոքրածավալ ռազմական կորուստների գնով պարտության դատապարտված թիրախներ»:
Մելիքյանը չբացառեց, որ այս իրավիճակից կարող է օգտվել Ադրբեջանը:
«Եթե հատկապես Իրանում ներքաղաքական իրավիճակն էապես ապակայունանա և քաղաքացիական բախումներ ծավալվեն կամ զինված դիմակայություն սկսվի գործող իշխանության և վերջինիս հակառակորդների միջև, ապա Բաքուն կարող է միաժամանակյա պատերազմական գործողություններ նախաձեռնել մեր դեմ ինչպես Արցախում, այնպես էլ Նախիջևանի կողմից»,- եզրափակեց նա: