Փոփոխությունների շարժիչ ուժը պետք է լինի կառավարությունը, բայց փոփոխությունների ճակատագիրը որոշողը քաղաքացիներն են. Ն. Փաշինյան
«Իմ քայլը հանուն Տավուշի մարզի» բիզնես ֆորումին Նիկոլ Փաշինյանը ելույթ ունեցավ և ներկայացրեց, թե ընդհանրապես նման ֆորումներն ինչ նպատակ ունեն: «Մեր ամենակարևոր նպատակը անհատական ջանքի խրախուսումն ու քաջալերումն է ՀՀ զարգացման գործում, որովհետև մենք համոզված ենք, որ ՀՀ քաղաքացիների անհատական ջանքն է այն շրջադարձային կետը, երևույթը, որը Հայաստանը պետք է բարձրացնի տնտեսապես, քաղաքականապես և բոլոր առումներով նոր մակարդակի»,-ասաց նա:
Վարչապետը նշեց, որ փոփոխությունների շարժիչ ուժը պետք է լինի կառավարությունը, բայց փոփոխությունների ճակատագիրը որոշողը քաղաքացիներն են: Նա նշեց, որ կառավարությունը պետք է հնարավորություն ստեղծի, որ մարդիկ իրենց տաղանդը բացահայտելու, իրացնելու հնարավորություններ ունենան: Վարչապետը մարդկանց կոնկրետ օրինակներ բերեց, ովքեր ներդրում են արել և նշեց, որ սկսում են այս պրոցեսը և բոլորի անունները հնչեցնելու են:
Նիկոլ Փաշինյանն ասաց, թե ցանկանում է ցույց տալ, որ ՀՀ-ում կան մարդիկ, ովքեր զրոյից հասել են ինչ-որ արդյունքների: «Այդ մարդիկ մեր ժամանակների հերոսներն են, և այդ մարդկանց օրինակը պետք է ոգևորի ուրիշներին»,-ասաց նա:
Վարչապետը նշեց, որ խնդիրը փողը չէ, փողն ընդհանրապես կարևոր չէ, կարևորն այն է, որ մարդն ամեն առավոտյան արթնանում է և գիտի, թե ինչ պետք է անի և օրվա վերջում բավարարված է զգում, որ ինչ-որ բան ստեղծեց:
«Եվ ինքը հաղթել է հուսահատությանը, հաղթել է քուչային, որ պետք ընդունված տրամաբանության համաձայն պպզեր և սպասեր, թե ով պետք է գա, իրենց առաջարկի` ներգրավվել ընտրակեղծարարների կրիմինալ թիմում, նա հաղթել է այդ իրականությանը»,-ասաց նա:
Վարչապետը նշեց, որ մի քանի դեպք կա, որ Երևանից տեղափոխվել են գյուղ, չնայած՝ հակառակն է տրամաբանությունը, որ գյուղից պետք է տեղափոխվել Երևան, որ հաջողություններ ունենան, ես էլ եմ այդ օրինակներից, ես վատ օրինակ եմ»,-ասաց նա: