Հայտնի է՝ ՌԴ-ից որքան զբոսաշրջիկ է հանգստանում Վրաստանում
Ըստ նախնական տվյալների՝ այժմ Վրաստանում է գտնվում զբոսաշրջային գործակալությունների միջոցով ՌԴ-ից մեկնած 5-7 հազար զբոսաշրջիկ։ Ինքնուրույն մեկնած քաղաքացիների թիվը երկու-երեք անգամ ավելի շատ է, հայտնում է Sputnik Georgia-ն՝ հղում անելով Ռուսաստանի տուրօպերատորների ասոցիացիայի գործադիր տնօրեն Մայա Լոմիձենի տարածած հաղորդագրությանը։
Թբիլիսիում անցկացվող բողոքի ցույցերի ֆոնին Ռուսաստանի Դաշնության նախագահ Վլադիմիր Պուտինը նախօրեին հրամանագիր է ստորագրել, որը ռուսական ավիաընկերություններին արգելում է հուլիսի 8-ից սկսած ՌԴ քաղաքացիներին փոխադրել Վրաստանի տարածք: Նշվում է, որ հրամանագիրն ստորագրվել է Ռուսաստանի և նրա քաղաքացիների անվտանգության նկատառումներով և գործելու է ժամանակավոր: Սույն հրամանագրով տուրօպերատորներին խորհուրդ է տրվում արգելքի գործողության ժամանակահատվածում ուղեգրեր չվաճառել դեպի Վրաստան։ Այն նաև կառավարությանը կարգադրում է Վրաստանում գտնվող ՌԴ քաղաքացիներն օգնել, որպեսզի վերադառնան Ռուսաստան։
Ռուսաստանի զբոսաշրջային արդյունաբերության միության մամուլի քարտուղար Իրինա Տյուրինան, իր հերթին, նշել է, որ ներկայում զբոսաշրջային գործակալությունների միջոցով Վրաստան մեկնած քաղաքացիների թիվը չի գերազանցում 5000-ը։
«Ըստ մոտավոր հաշվարկների՝ Վրաստան մեկնած քաղաքացիների թիվը չի գերազանցում 5000-ը, սակայն ինքնուրույն այդ երկիր մեկնած զբոսաշրջիկների թիվն ավելին է»,-հավելել է նա։
Մամուլի քարտուղարի խոսքով՝ բոլոր զբոսաշրջիկները պետք է մինչև հուլիսի 8-ը կազմակերպված ձևով լքեն պետությունը։
«Մինչև հուլիսի 8-ը, երբ Վրաստանի հետ ավիահաղորդակցությունը դադարեցվելու է, դեռ երկու շաբաթ կա։ Շատ զբոսաշրջիկների հանգիստը մինչ այդ կարող է ավարտված լինել, նրանց հանգիստը սովորաբար տևում է 7-14 օր»,-հայտնել է նա։
Նա նաև նշել է, որ նոր զբոսաշրջիկներ արդեն Վրաստան չեն մեկնի, քանի որ տուրօպերատորներին խորհուրդ է տրվել արգելքի գործողության ժամանակահատվածում ուղեգրեր չվաճառել այդ ուղղությամբ։