Бўкалик тиббиётчилар президентимизни алдашдан-да тийила олишмаяпти…
Сўнгги маълумотларга кўра, шу йил 1 июн куни президентимиз Шавкат Мирзиёев Тошкент вилояти Бўка туманига ташриф буюрган. Ташриф олдидан қишлоқлардан бирида бунёд этилган «Бўстон» врачлик пунктига Олмалиқдаги марказий поликлиника мебелларини олиб келиб ўрнатишган. Шу йўл билан бўкалик тиббиётчилар президентимизга нисбатан кўзбўямачилик қилишган. Гарчи мамлакатимиз раҳбари бу пунктга кирмаган бўлса-да, тез кунда, аниқроғи, 18 июн куни ярим тунда иккита юк машинасида мебелларни поликлиникага қайтариб олиб келишган.
Олмалиқдаги исми-шарифи сир тутилган врачлардан бирининг гапига қараганда, 19 июн куни ишга келса, 1 ойча олдин кабинетидан олиб чиқиб кетилган мебеллар турибди экан. Санитаркалар зудлик билан мебелларни бўш кабинетларга тарқатишган.
— Президентимизга қишлоқ врачлик пункти юқори сифатли мебеллар билан жиҳозланганини намойиш этиш ниятида бўкалик ҳамкасбларимиз кўзбўямачиликдан ҳам тийила олишмабди, — деди у. — Лекин яна бир нарса бор. Олмалиқдан олиб кетилган мебелларнинг кўпи ортга қайтарилмади. Олиб қолишибди. Шунинг оқибатида биз беморларни тик турган ҳолда қабул қилмоқдамиз. Чунки ўтирадиган стулларгача Бўкага олиб кетилган.
Афсус, юртбошимиз ҳар бир йиғинда алдовларга, кўзбўямачиликка қоришиқ амалларни ёқтирмаслиги ҳақида қанча куйиниб сўзламасин, жойлардаги айрим шахслар ўз билганидан қолмаяпти. Ишқилиб яхшиликка бўлсин!
Астағфирилло!!!