ABŞ-ın Rusiyaya qarşı yeni sanksiyalarının mənası varmı?
Kremlin ABŞ seçkisinə müdaxiləsinə cavab olaraq irəli sürüləcək bu sanksiyalar həm də Rusiyanın dövlət borcunu və zəngin vətəndaşlarını hədəfləməlidir.
İyunun 21-də təqdim olunmuş təklifə habelə indiyədək demokrat və respublikaçılar tərəfindən qaldırılmış qanunvericilik təşəbbüsünün elementləri daxildir.
Bu, təkliflərin Konqres səsverməsindən keçəcəyinə ümid yaradır.
Təkliflərdə habelə ABŞ seçkilərində səsvermə təhlükəsizliyinin gücləndirilməsi və internetdə verilən siyasi reklamların şəffaflığı nəzərdə tutulur.
Nümayəndələr Palatasının 27 üzvü Rusiyanın xaricdəki maye qaz layihələrinin, Kremlə dəstək verən bankların və Moskvanın kibertəhlükəsizlik sənayesinin hədəflənməsini təklif edib.
Onlar həmçinin Rusiya prezidenti Vladimir Putinə yaxın siyasətçilərin, oliqarxların və onların ailə üzvlərinin sanksiyalanmasını istəyirlər.
ABŞ kəşfiyyatı Rusiyanın 2016-cı il ABŞ seçkisinə “sistemli, çoxsaylı” müdaxilə cəhdləri etdiyi barədə qərara gəlib.
Rusiyanın bu müdaxilə cəhdləri ABŞ Konqresində ABŞ seçki sisteminin müdafiəsi ilə bağlı 11 qanunun qəbulu ilə nəticələnib.
Hazırda ABŞ Nümayəndələr Palatasında demokratlar, Senatda isə respublikaçılar çoxluqdadır.
Ölkədə 2020-ci ilin prezident seçkisi kampaniyasına start verilib.
Bütün bu müddət ərzində Konqres Rusiyanın dövlət borcu ilə bağlı sanksiyalar qəbul edilib-edilməməsini götür-qoy edib.
ABŞ-ın Ruisyanın dövlət borcuna sanksiya qoyması Qərb investorlarının Rusiya hökumət bondlarını almasını çətinləşdirərdi, bu da öz növbəsində Kremlin maliyyə yükünü artırmış olardı.
Lakin təhlilçilər düşünürlər ki, ABŞ millət vəkillərinin bu məsələni həddən artıq uzun müddətdə müzakirə etməsi Moskvaya müəyyən hazırlıq tədbirləri görmək imkanı verib.
Vaşinqtonda mənzillənmiş Beynəlxalq Maliyyə İnstitutunun baş iqtisadçısının müavini Elina Ribakova deyir ki, Rusiya hazırda xarici bazarlara daxil olmaq üçün 3-4 il əvvəl duyduğu ehtiyacı duymur.
Onun sözlərinə görə Rusiyanın Mərkəzi Bankı və investorlar bütün mümkün məhdudlaşdırıcı tədbirlərə hazırlaşa biliblər.
Analitiklərin fikrincə, məhz buna görə də Putinin yaxın çevrəsinə sanksiyaların qoyulması elə bir ciddi təsirə malik olmayacaq, çünki sözü gedən şəxslər xaricdəki aktivlərini Rusiyaya transfer etməyə vaxt tapıblar.