Gürcistandaki narazılıqlar: 240 insan yaralandı, muhalifet yañı mitingni teşkil ete

İyünniñ 21-ne keçer gecesi Tifliste narazılıq bildirgenler ve politsiya hadimleri arasında yüz bergen çatışmalarda 240 insan yaralandı. Olarnıñ arasında 80 politsiya hadimi bar. Bu aqta Gürcistan sağlıq nazirligi bildirdi. 


Gürcistan muhalifeti iyünniñ 21-nde aqşam Tiflisniñ merkezinde olacaq yañı narazılıq aktsiyası aqqında bildirdi. Muhalifet liderleri parlament reisi İrakliy Kobahidze, iç işler naziri Georgiy Gahariyanıñ istifasını ve parlamentte nevbetten tış parlament saylavlarınıñ keçirilmesi muzakere etmege talap etkenlerini jurnalistlerge bildirdi, dep haber ete Azatlıq Radiosınıñ rus bürosı mühbiri.


Tünevin aqşam on biñge yaqın insan Gürcistan parlamentiniñ binası ögünde mitingge toplaştı.


Rusiye Devlet dumasınıñ deputatı Sergey Gavrilov Tifliste keçirilgen Parlamentlerara pravoslavlıq assambleyasınıñ sessiyasını Gürcistan parlamentiniñ spikeri yerinde oturıp açqan soñ narazılıqlar başladı. Deputatlar buña açuvlanğan edi. 


Muhalifet firqalarınıñ deputatları minberni blok etip, Rusiye eyyetine toplaşuv salonına qaytmağa imkân bermedi. Rusiye eyyeti binanı qaravulnen terk etti. 


Parlament ayatlarını vatandaş faalleri toldurıp, forum teşkilâtçısı olğan «Gürcistan arzusı» deputatı Zakariya Kutsnaşvilini cezalamağa tırıştı. O, olıp keçken adiseni «tehnik hata» dep adlandırdı. 




«Gürcistan cemiyetiniñ Gürcistan parlamentiniñ reisi yerinde Rusiye deputatını körip ne qadar açuvlanğanını añlayım. Ve afu soramağa isteyim. Teşkiliy işlerni daa yahşı azırlamaq kerek edim», – dedi Zakariya Kutsnaşvili. 


Amma qarşılıq mında bitmedi. Parlamentni yüzlernen açuvlanğan insan sarıp aldı. Ükümran firqanıñ reisi, iş adamı Bidzina İvanişvili parlamentte «işğalci memleketniñ vekili» içün yer ayırğanlarnı cezalaycağını vade etti.  Forum keçirilmesini ve Gürcistannıñ iştirak etmesini prezident, baş nazir ve ükümdar taqımnıñ bir qaç lideri takbih etti. Muhalifet mesüliyetni bütün ükümran firqanıñ boynuna yükledi. 


«Gürcistan arzusınıñ» asılında «Rus arzusı» olğanı belli oldı. Bidzina İvanişviliniñ «arzusı» – Vladimir Putinniñ arzusıdır, Gürcistan parlamentiniñ spikeri oturacaq yerde Rusiye deputatı otura. Halqımızğa ve devletimizge daa ziyade aqaretlev yapılmağan edi», – dedi Tinatin Bokuçava, «Yekâne milliy areketniñ» deputatı. 




Kommunist Gavrilov ise Moskva ve Tiflis arasında çeşit gumanitar ve iqtisadiy meselelerniñ muzakereleri telüke altında buluna, dep bildirdi. Bir qaç künge belgilengen pravoslav forum programması da telükege oğradı.


Parlamentlerara pravoslav assambleyası – 1993 senesi Yunanistan parlamentiniñ teşebbüsi ile qurulğan parlamentlerara teşkilâttır.