Грузин парламентинин төрагасы кызматынан кетти
Оппозиция лидерлери Кобахидзени жана ички иштер министрин кызматтан кетүүгө үндөп, бүгүн кайрадан көчөгө чыгышарын эскертишкен. Демонстранттар ошондой эле мөөнөтүнөн мурда парламенттик шайлоо өткөрүүнү талап кылышууда.
Өкмөт 20-июнда кечинде жана жумага караган түнү демонстранттар менен полициянын кагылышууларында 240 киши жарадар болгонун, 100 киши ооруканаларда кала бергенин билдирди.
Нааразылыкка орус Мамлекеттик Думасынын депутаты Сергей Гавриловго байланышкан окуя себеп болгон. Гаврилов Грузияга Православ өлкөлөрүнүн парламенттер аралык ассамблеясына төрагалык кылуу үчүн барган. Нааразылыкка чыккан грузиндер жыйын учурунда анын спикердин креслосуна отурушун "Грузияны сыйлабастык" катары баалашты.
Грузиндер Гавриловду орус президенти Владимир Путиндин өнөктөшү катары көрүшөт. Жикчил Түштүк Осетия менен Абхазия боюнча Орусиянын саясатын колдойт деп сындап жатышат.