Самарқанддаги ноқонуний қурилишлар: 17 та объект тўлиқ ёки қисман бузилади
Бугун, 21 июнь куин Самарқанд вилоят ҳокимлигида ҳуқуқни муҳофаза қилиш органлари вилоят бўлимлари раҳбарияти ва суд раислари иштирокида ОАВ ходимлари учун матбуот анжумани ўтказилди. Унда вилоят миқёсидаги кўплаб муаммоли ҳолатларга ойдинлик киритилди.
«Дарё» мухбирининг хабар беришича, 2018 йилда Самарқанд шаҳрида қурилаётган бино ва иншоотлар Ўзбекистон Республикаси Қурилиш вазирлиги ва бошқа тегишли орган ходимлари томонида ўтказилган хатлов натижасига кўра, 159 та объектда қонун бузилиш ҳолатлари аниқланган. Ушбу ҳолатлар бўйича республика комиссиясининг хулосасига кўра 17 та объектни тўлиқ ёки қисман бузиш керак деб топилган.
– 17 та объектни бузиш учун лойиҳа смета ҳужжатлари тузилган ва шу ҳужжатларга асосан бугунги кунда 17 миллиард сўмга яқин маблағлар сарфланиши ҳисоблаб чиқилган, — дейди вилоят прокурорининг ўринбосари Сирожиддин Усмонов. – Бузилиши лозим деб топилган объектларнинг 3 таси Даҳбет кўчасидаги 14, 45 ҳамда Мироншоҳ кўчасидаги 4-уй ҳисобланади. Хатловга қадар шаҳар иқтисодий судининг объектларни бузиш тўғрисида ҳал қилув қарорлари мавжуд бўлиб, 13 та объектни бузиш бўйича фуқаролик ишлари бўйича Самарқанд шаҳар судига даъво аризаси киритилган. Шундан 8 та даъво аризаси тўлиқ ва қисман қаноатлантирилиб, биттаси рад этилган.
Матбуот анжуманида маълум қилишича, Мажбурий ижро бюроси томонидан 13 та объектни бузиш учун ижро ҳужжатлари расмийлаштирилган бўлиб, ҳозирда ижро ҳаракатлари давом эттирилмоқда.
Республика комиссиясининг хулосасига асосан вилоят миқёсида ҳал этилиши лозим бўлган 141 та объектнинг 12 таси белгиланган меъёрдан четга чиққан. 129 тасининг фасад қисми Маданият вазирлиги билан келишиш бўйича лойиҳа таклифлари ишлаб чиқилиб, шаҳарсозлик кенгашига юборилган. Шундан 116 та объектнинг лойиҳа таклифи ва жойлашуви маъқулланиб, 9 таси рад этилган ва 16 та таклиф қайтарилган.
– Вилоят прокуратураси органи томонидан ноқонуний қурилишлар томонидан доимий текширувлар олиб борилиб вилоят бўйича 100 дан ортиқ ноқонуний қурилишлар олиб борилаётганлиги аниқланган. Уларни бузиш бўйича ҳужжатлар расмийлаштирилиб судларга юборилган, — дейди вилоят прокурорининг ўринбосари Сирожиддин Усмонов. – Самарқанд шаҳар ҳокимлигининг қурилиш бўйича чиқарилган 19 та қарорига прокуратура томонидан протест келтирилиб, қарорлар бекор қилинган.
Вилоят прокурори ўринбосари Самарқанд шаҳридаги Қорасув массивида бўлган ноқонуний қурилишлар бўйича ҳам маълумот бериб ўтди. Хусусан, Самарқанд давлат ўрмон хўжалигининг Даҳбет-1 участкаси ҳудудидаги ерларни ноқонуний равишда фуқароларга сотиб юборганлиги ҳолати юзасидан Самарқанд туман прокуратураси томонидан Жиноят Кодексининг 168-моддаси (фирибгарлик) ва 228-моддаси 1-қисми (сохталаштириш) бўйича жиноят иши очилиб тергов ҳаракатлари олиб борилмоқда.
Айнан шу тергов ҳаракатлари давомида 116 нафар фуқарога боғдорчилик-узумчилик ташкил қилиши учун 9,5 гектар ер майдони ажратилган бўлса-да, улар ширкат ташкил қилмасдан ер кодексининг 56-талабларига зид равишда ноқонуний уй-жой қуришган. 7 нафар фуқаро 87 сотих ер майдонини ўзбошимчалик билан эгаллаб олган.
Самарқанд туман ҳокимининг қарори билан 123 нафар фуқаронинг 62 нафари ер майдонини девор билан ўраганлиги, 23 нафари пойдевор қўйганлиги, 23 нафари уй-жой қурганлиги ва 17 нафари тош тўкканлиги аниқланган. Фуфаролик ишлари бўйича Тайлоқ туманлараро судига киритилган даъво аризалари асосида 119 та ноқонуний жойларни бузиш бўйича суд ҳукми чиқарилган. Шунингдек, туман ҳокимининг қарори билан 42 нафар ва ўрмон хўжалигининг йиғилиш баёни билан 4 нафар фуқарога тадбиркорликни ривожлантириш учун 38,5 гектар ер майдони ноқонуний тарзда берилган. Тергов ҳаракатлари олиб борилмоқда.
– Тергов жараёнида 19 та ҳолатда Самарқанд вилояти ўрмон хўжалигининг собиқ раҳбарлари томонидан жами 143500 АҚШ долларига ер майдонлари фуқароларга ноқонуний сотганлиги аниқланиб, шу зарарлар тўлиқ фуқароларга қайтариб берилган. Ҳозирда мазкур ҳолатлар бўйича тергов ҳаракатлари олиб борилмоқда, — дейди вилоят прокурорининг ўринбосари Сирожиддин Усмонов.
Самарқанд вилояти прокурори ўринбосари Сирожиддин Усмонов халқ орасида Умарбой деб танилган Умар Ражабовнинг ўғли Олим Ражабов фуқароларга қанча миқдорда зарар етказгани ҳақида ҳам тўхталиб ўтди. Прокуратура ходимининг айтишича, Олим Ражабов «Афросиёб Хосият Бегим Макони» номли МЧЖ очган ва Самарқанд шаҳрининг қатор ерларида кўп қаватли уйлар қурган.
Маълум бўлишича, Даҳбет ва Мироншоҳ кўчаларида кўп-қаватли уйлар қурган Олим Ражабов фуқаролардан 50 миллиард 578 миллион сўм миқдорида маблағни талон-тарож қилган, яъни шунча миқдорда ноқонуний қурилган уйларни сотган. МИБ томонидан Олим Ражабовга тегишли 20 миллиард 600 миллион сўмлик мол-мулк мусодара қилинган.