აქციაზე რეზინის ტყვიებით დაშავდნენ ჟურნალისტები

თბილისში პარლამენტის შენობასთან მიმდინარე აქციის დაშლის გაშუქებისას დაშავდნენ ჟურნალისტები. მათ უმრავლესობას სპეცრაზმის მიერ ნასროლი რეზინის ტყვიები მოხვდა.  


აქციაზე დაშავდა როიტერსის კორესპონდენტი სამხრეთ კავკასიაში მაკა ანთიძე. მას ზურგში მოხვდა აგურის ნატეხი, გაბზარული აქვს ნეკნი. 


დაშავდნენ მედიასაშუალება On.ge-ს ჟურნალისტები გვანცა ნემსაძე და ანა ვახტაგაძე, მათაც რეზინის ტყვიები მოხვდათ.


რეზინის ტყვია მოხვდა საზოგადოებრივი მაუწყებლის ოპერატორს. ის ინგოროყვას სახელობის კლინიკაში გადაიყვანეს. რეზინის ტყვიები მოხვდათ ტვ პირველისა და რუსთავი 2-ის ოპერატორებსაც.


„ინტერპრესნიუსი" იტყობინება, რომ რუსთაველის გამზირზე მიმდინარე საპროტესტო აქციაზე დაშავდა მათი კორესპონდენტი თორნიკე კოშკაძეც. 


რეზინის ტყვია მოხვდა რადიო თავისუფლების ოპერატორსაც. 


პოლიციელებმა ფიზიკური და სიტყვიერი შეურაცხყოფა მიაყენეს "ნეტგაზეთის" ჟურნალისტს, გიორგი დიასამიძეს. 


civil.ge-ს ჟურნალისტს, გურამ მურადოვს ზურში აქვს რამდენიემე რეზინის ტყვია მოხვედრილი, ის საავადმყოფოში გადაიყვანეს.


საგანგებო განცხადებას ავრცელებს ჟურნალისტური ეთიკის ქარტია და სამართალდამცავ ორგანოებს მოუწოდებს დაიცვალ ჟურნალისტების უსაფრთხოება. 


"კორესპონდენტებს რეზინის ტყვიები მოხვედრილი აქვთ თვალის, ყელის არეში, თავსა და მკერდში. რამდენიმე მათგანის განცხადებით, პოლიცია მათი მისამართით რეზინის ტყვიებს დამიზნებით ისროდა მას შემდეგაც კი, როცა ისინი სამართალდამცავებს ეუბნებოდნენ რომ მედიის წარმომადგენლები იყვნენ ." - აღნიშნულია განცხადებაში.