Умрадаги “гапи” учун Абдулла Қурбонов лицензиядан маҳрум қилинди
Бу ҳақда Озодликка билдирган Маданият вазирлиги мулозимига кўра, хонанда “санъаткор одобигa риоя қилмагани ва лицензия шартларида кўзда тутилган талабларни бажармаганлиги боис” жазоланган.
Маданият вазирлиги мулозими “Абдулла Қурбонов маҳаллийчиликни тарғиб қилувчи ва санъаткор одобига тўғри келмайдиган ноўрин видеороликни ижтимоий тармоқларда кетма-кет чиқаргани унинг лицензиясини бекор қилишга асос бўлган"ини айтаркан, яна бундай деди:
- Қурбонов Абдулла Акбарович номига концерт-томоша фаолиятини амалга ошириш ҳуқуқи учун берилган АА-серияли, 5706-сон лицензиянинг амал қилиши 2019 йил 31 май кунидан тугатилди.
Маданият вазирлиги мулозимининг айтишича, "Абдулла Қурбонов билан Интернетда баҳсга киришган хонанда Жаҳонгир Отажоновнинг лицензия муддати тугаган ва бошқа узайтирмасликка қарор берилган".
Тармоқдаги жанг
Хонанда Абдулла Қурбоновнинг Умра сафари пайтида хонанада Жаҳонгир Отажоновга мурожаати акс этган аудио 27 май куни тармоқда тарқалган эди.
“Тошкент ёқмаётган бўлса, бориб Хоразмингда яша, Хоразмда яша, ўша Хоразмда. Ҳа, Тошкентни пули сани қутиртириворибди-ку, Жаҳон! Тўйга биринчидан кастим-шимда борилади. Бу чёртга ўхшаб, ..., тўғрисини айтаман, кўнглига келмасин ҳеч кимни-ю, буни тўйхонага кийиб борган кийимини бору, итимга кийгизмайман, итимга!” дейди тармоқда тарқаган видоеда Абдулла Қурбонов
Қурбоновнинг гаплари остига қолдирилган изоҳлардан маълум бўлишича, унинг ғазабга минишига қўшиқчи Жаҳонгир Отажоновнинг телевизорда намойиш этилган жонли ижро танловини кўриб, гапирган фикрлари сабаб бўлган.
“Илтимос, живой ашула айтманглар! Айтганман-ку сизларга мен эплолмайсизлар деб. Ўқиш керак бунинг учун олдин. Хафа бўлманглар, энди майли”, дея кулган эди “Хуршидникида ифторда” ўтирганини билдирган Жаҳонгир Отажонов.
Сўконғич қўшиқчи
Ўтган йилнинг июнида “Ўзбекконцерт” раҳбари Одилжон Абдуқаҳҳоров хонанда Абдулла Қурбоновнинг ижтимоий тармоқларда тарқалган “Миллион” жамоасини ҳақорат қилувчи интервьюси учун унга огоҳлантириш берилганини айтган эди.
Ижтимоий тармоқда тарқалган видеода Қурбонов томошаларида унга тақлид қиладиган “Миллион” жамоасини “Миллион башаралар” деб атаган эди.
Абдулла Қурбонов 2013 йилда ўзбек милиционерларининг “онаси билан президентнинг кабинетида жинсий алоқа қиламан ”, дея сўккани акс этган видеотасвир Интернет ва қўл телефонларида тарқатилгани ортидан икки йилга озодликдан маҳрум этилган эди.
Куëвтўра Абдулла
Абдуллла Қурбонов 43 ëшда. Бир қиз, уч ўғилнинг отаси. 1987 йилда "Анори донаю дона” қўшиғини айтиб, таниқли қўшиқчи Фаррух Зокировнинг назарига тушган.
Ана шундан кейин 1990 йилда Фаррух Зокиров унга атаб, “Куëвтўра Абдулла” номли қўшиқни ижро қилганидан кейин Абдулла Қурбоновнинг пилиги кўтарилиб, санъат оламида танилган эди.
Озодлик билан суҳбатда “Ўзбекнаво” эстрада бирлашмасида ишлаëтган қўшиқчи бор йўғи уч синфни битиргани¸ бошқа ўқимаганини айтган.
- Оллоҳ юқтирган ашулачиман. Ўз вақтида ўқимаган бўлсам ҳам, устозлардан ўрганганман. Муҳриддин Ҳолиқов, Фаррух Зокировларни устоз, деб биламан. Улардан кўп нарсани ўрганганман¸- деган эди хонанда.