Երբ մտքերի փոխանակություն տեղի կունենա, ԲՀԿ-ն իր պաշտոնական դիրքորոշումը կհայտնի․ Վ․ Էնֆիաջյանը՝ ՍԴ դատավորի թեկնածու Վահե Գրիգորյան մասին
ԱԺ փոխնախագահ, ԲՀԿ խմբակցության անդամ Վահե Էնֆիաջյանը չի կարող ասել, թե ինչ դրդապատճառներից ելնելով է ՀՀ նախագահ Արմեն Սարգսյաննը ՍԴ դատավորի թեկնածու առաջադրել Վահե Գրիգորյանին։ Նա ԱԺ-ում լրագրողների հետ զրույցում հորդորեց հարցն ուղղել հասցեատիրոջը՝ միաժամանակ նկատելով, որ դա ՀՀ նախագահի սահմանադրական իրավունքն է։
Հարցին՝ սա իշխանության կա՞մքն էր, Էնֆիաջյանը պատասխանեց․ «Երբ կհնչեն հարցեր, մտքերի փոխանակություն տեղի կունենա, ըստ այդմ՝ Բարգավաճ Հայաստան կուսակցության ներկայացուցիչներով մենք մեր պաշտոնական դիրքորոշումը կհայտնենք։ Թե ինչ դրդապատճառներ են ունեցել, ինչ հանգամանքներում է այս առաջադրումը, չեմ էլ կարող պատասխանել»,- շարունակեց Վահե Էնֆիաջյանը։
Հիշեցնեք, որ Հանրապետության նախագահը Արմեն Սարգսյանը ՍԴ դատավորի թափուր տեղի համար առաջադրել է Վահե Գրիգորյանի թեկնածությունը։
Նշենք, որ օրերս խորհրդարանը կողմ չքվեարկեց ՀՀ նախագահ Արմեն Սարգսյանի կողմից առաջադրված Սահմանադրական դատարանի թեկնածու Արթուր Վաղարշյանի օգտին։ 7-րդ գումարման ԱԺ-ում սա արդեն ՍԴ դատավորի թեկնածուի ընտրման 3 փորձն է, իսկ 6-րդ գումարման ԱԺ-ում 2 անգամ է տապալվել ՍԴ անդամ ընտրելու գործընթացը։