ՄԱԿ-ի ռուսաստանցի աշխատակցը՝ persona non grata Կոսովոյում

Կոսովոն persona non grata՝ «անցանկալի անձ» է անվանել ՄԱԿ-ի ռուսաստանցի աշխատակից Միխայիլ Կրասնոշեկովին և հայտարարել է, որ նրա գտնվելը երկրի տարածքում այլևս աննպատակահարմար է:


Այդ մասին այսօր Ֆեյսբուքի իր էջում հայտնել է Կոսովոյի վարչապետ Ռամուշ Հարադինայը:


Բացի այդ, վարչապետը Կոսովոյում ՄԱԿ-ի գլխավոր քարտուղարի ներկայացուցչից պահանջել է ապահովել երկրի տարածքից Կրասնոշեկովի հեռանալը:


Մինչդեռ, ՄԱԿ-ի գլխավոր քարտուղար Անտոնիո Գուտերեշն այս տարվա հունվարին Սոմալիում տեղի ունեցած զարգացումների կապակցությամբ հրապարակել է հայտարարություն, որի համաձայն, «անցանկալի անձ» հասկացությունը չի կարոող կիրառվել ՄԱԿ-ի աշխատակիցների և ներկայացուցիչների նկատմամբ:


Կոսովոյի ոստիկանները Կրասնոշեկովին ձերբակալել են մայիսի 28-ին՝ հյուսիսում սերբաբնակ ավաններում իրականացրած գործողության ընթացքում, որի նպատակն էր, ըստ Կոսովոյի իրավապահների, «կասեցել քրեական ակտիվությունը»:


Կոսովոյի ոսստիկանները մայիսի 28-ին Կրասնոշեկովից բացի ձերբակալել էին ՄԱԿ-ի առաքելության ևս մեկ աշխատակցի և 6 սերբերի:


Գործողության ժամանակ վնասվածք ստացած Կրասնոշեկովին կարճ ժամանակ անց ազատ են արձակել, և նա օգնություն է ստացել Միտրովիցայի հիվանդանոցում, որտեղից ավելի ուշ տեղափոխվել է Բելգրադի զինվորական բժշկական ակադեմիայի հոսպիտալ:


Սերբիայում Ռուսաստանի դեսպան Ալեքսանդր Չեպուրինը «բարբարոսություն և գազանություն» է անվանել Կրասնոշեկովի հետ տեղի ունեցած միջադեպը և նրան այցելել է հոսպիտալում:


Այդ օրը Տոկիոյում գտնվող Ռուսաստանի արտգործնախարար Սերգեյ Լավրովը հայտարարել է, որ նման վերաբերմունքը ՄԱԿ-ի աշխատակիների նկատմամբ «բացարձակ անընդունելի է»: