“Basqını aydınlatqanlarğa qarşı basqı”: UJMB Qırımda qırımtatar faallerniñ tutulğanını tenqit etti

Rusiye quvetçileri Qırımda mayıs 30-ında, cemaat jurnalisti, “Qırım birdemligi”niñ faali Lütfiye Zudiyevanı ve qırımtatar faali Mümine Saliyevanı tutıp alğanı, Rusiye akimiyeti yarımadada yapqan basqı siyasetiniñ quvetleştirüvini köstere, dediler Ukraina jurnalistlerniñ milliy birliginde (UJMB).


UJMB “yarımada vaziyetini aydınlatqan cemaat jurnalistleri ve faallerge qarşı yapılğan basqını qatiyen tenqit ete”, denile UJMB reisi Serğiy Tomilenkonıñ beyanatında onıñ Facebook saifesinde.




“Basqını aydınlatqanlarğa qarşı basqı. Qırımda rusiye quvetçileri, yekâne mustaqil haber menbasına - cemaat jurnalistlerge - basmaqnı devam ete. Ve biz, em de bizim halqara ortaqlarımız, Lütfiye ve onıñ meslekdeşlerinen birdemmiz ve olar içün azatlıqnı talap etemiz”, - yazdı Tomilenko.​


Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.


Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.


Bundan evel qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyeva Aqmescitteki Rusiye Ekstremizm ile küreş merkezinden yiberildi.


Faalniñ aytqanına köre, oña qarşı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayışı – memuriy dava açıldı.


Al-azırda Qırım ve qomşu Rusiyeniñ müessiseleri bir de bir izaat bermediler.