د ارزګان چارواکي: په چهارچینو ولسوالۍ کې ۳۲ طالبان وژل شوي
د ارزګان امنیه قوماندان محمد خطاب خنجري ازادي راډیو ته تأیید کړه چې طالبانو د یوه هاموې ټانک په واسطه په چهارچینو ولسوالۍ برید کړی.
دی وايي، د افغان سرتیرو د مرګژوبلې دقیق ارقام نهلري، خو ادعا کوي چې ۳۲ طالبان وژل شوي.
اخوا د ارزګان ولایت د ولایتي شورا مرستیال محمد کریم ازادي راډیو ته وویل چې د چهارچینو پر امنیه قوماندانۍ او د ملي اردو په مرکز د طالبانو په ډلهییز برید کې ۸ پولیس او ۱۱ د ملي اردو سرتیري وژل شوي او ۶ پولیس ټپيان دي.
د ولایتي شورا د مرستیال په خبره طالبان وروسته له هغه له دې سیمې ووتل چې بهرني هوايي ځواکونه سیمې ته ورسېدل.
طالبانو ادعا کړې چې چهارچینو ولسوالي یې پهدې برید کې سقوط کړې ده.
د دوی دا ادعا افغان چارواکي ردوي.