«Իրավունք». Հիմա էլ «Իմ քա՞յլն» է դեմ ըլլալով՝ կողմ

«Երկար «չեմուչումից» հետո ՀՀ վարչապետ Նիկոլ Փաշինյանն ընդունեց ՀԱՊԿ գլխավոր քարտուղարի Բելառուսի թեկնածու Ստանիսլավ Զասին Երևանում: Դրան էլ նախորդել էր Ս. Զասի նշանակման մասին քննարկումը ՀԱՊԿ անդամ երկրների ԱԳ նախարարների մակարդակով, որի ժամանակ առնվազն ՀՀ ԱԳ նախարար Զոհրաբ Մնացականյանի ժպիտը հուշում էր, որ Հայաստանը դեմ չէ:

Ի վերջո, Հայաստանը տվե՞լ է իր համաձայնությունը ՀԱՊԿ գլխավոր քարտուղարի պաշտոնում Ստանիսլավ Զասի թեկնածությանը, թե իշխանությունը մնացել է ամիսներ առաջ իր ար­տահայտած դիրքորոշմանը, հետաքրքրվեցինք ԱԺ արտաքին հարաբերությունների մշտական հանձնաժողովի փոխնախագահ, «Իմ քայլը» խմբակցության պատգամա­վոր Հովհաննես Իգիթյանից:

-Դեռ կես տարի կա և գուցե Բելառուսը մտափոխվի և հանի իր թեկնածուին: Հայաստանը փորձում է ՀԱՊԿ-ի կանոնադրության որոշ բա­ցերը փակել և առաջարկու­թյուններ անել՝ այս անհեթեթ իրավիճակի հետ կապված, երբ գլխավոր քարտուղարը վաղաժամկետ դադարեցնում է գործունեությունը, և այ­լևս հստակ չէ, թե ինչ է լինե­լու:

Իսկ ինչ վերաբերում է Զասին, ապա կա պրոցեդուրա: Երբ այդ հարցը կգա, Հայաստանը իր դիրքորոշումը կներկայացնի: Մենք ո´չ կողմ ենք, ո´չ դեմ ենք: Այսօր էական չէ՝ որևէ երկիրը կո՞ղմ է, թե դեմ է, որովհետև կա ընտրելու գոր­ծընթաց:

-Պարոն Իգիթյան, բայց լուրեր են շրջանառվում, որ ՀԱՊԿ անդամ երկրնե­րի հետ Հայաստանը փոխհամաձայնության է եկել, որ կընդունեն Ստանիսլավ Զասի թեկնածու­թյունը, եթե մինչև 2020 թվա­կանին ՀԱՊԿ նոր քարտուղար չընտրվի: Ի՞նչ կասեք այս մա­սին:

- Նայեք, թե ինչ է եղել. ՀՀ թեկնածուն հայտնի դեպքե­րից հետո դադարեց լինել ՀԱՊԿ գլխավոր քարտուղար, որից հետո վակուումային իրավիճակ ստեղծվեց, քանի որ կանոնադրությունը պա­տասխան չէր տալիս: Սա հարց չէ՝ Հա­յաստանն ուզում է, թե չի ուզում, այլ Հայաստանն ասում էր, որ նման իրավի­ճակը պետք է կանոնակարգվի կանո­նադրությամբ, և առաջարկեց իր տար­բերակը, որը բոլորի համար է: Իմ ունե­ցած տեղեկություններով՝ ՀՀ-ն որևէ պայմանավորվածության չի գնացել, որևէ համաձայնություն չի տվել»,-գրում է թերթը:

Նյութն ամբողջությամբ կարդացեք թերթի այսօրվա համարում: