«Տողերի արանքում». ՀՀ–ը պետք է գործողությունների ծրագիր ունենա Իրան-ԱՄՆ լարվածության աճի արդյունքում զարգացումների ցանկացած սցենարի համար (տեսանյութ)
«Տողերի արանքում» նախագծի հերթական թողարկմանը փորձագետ Կարեն Բեքարյանը և լրագրողներ Հռիփսիմե Հովհաննիսյանն ու Հասմիկ Վարդանյանը քննարկել են անցնող շաբաթվա արտաքին քաղաքական և միջազգային կարևոր թեմաները:
Զրուցակիցներն անդրադարձել են Երևանում կայացած ԵԱՏՄ միջկառավարական խորհրդի նիստին: Կարեն Բեքարյանի կարծիքով` վարչապետի մակարդակով ՀՀ մասնակցությունը ԵԱՏՄ և´ միջկառավարական, և´ բարձրագույն տնտեսական խորհուրդների նիստերին ինչ-որ պահից ազդելու է կառույցում մեր շահերի վրա, քանի որ հարցերը քննարկվում են տարբեր մակարդակներում և մակարդակից մակարդակ անցման ժամանակ շահերին հետամուտ լինելու խնդիրը փոխվում է, վարիացիաներ է ստանում, և նույն դեմքով հանդես գալը որոշակի խնդիրներ է առաջացնում: Պետք է հնարավորինս արագ շտկել այս իրավիճակը, որն առաջացել է Հայաստանի` խորհրդարանական կառավարման համակարգի անցնելու արդյունքում:
Կարեն Բեքարյանի կարծիքով` Հայաստանը ԵԱՏՄ-ում պետք է շեշտը դնի Հայաստանի համար ավանդական ոլորտների վրա, օրինակ՝ գյուղատնտեսության, ինչպես նաև այն ոլորտների վրա, որոնք լոգիստիկ խնդիրներ չեն առաջացնում, օրինակ՝ ՏՏ-ն:
ԵԱՏՄ-ի՝ որպես կառույցի արդյունավետությունը բարձրացնելու համար փորձագետը կարևորեց հատկապես շահառու խմբերի մոտ ԵԱՏՄ-ի ընձեռած հնարավորությունների մասին իրազեկվածությունը բարձրացնելը:
Անդրադառնալով Իրան-ԱՄՆ լարվածության աճին և Հայաստանի վրա դրա հնարավոր ազդեցությանը` նշվեց, որ Հայաստանը կարող է հարթակ դառնալ կողմերի միջև երկխոսության համար: Սակայն փորձագետի կարծիքով` այս պահին երկխոսության ցանկություն չի նկատվում ո´չ ԱՄՆ-ի, ո´չ էլ Իրանի մոտ, ուստի՝ Իրան-ԱՄՆ լարվածության աճի արդյունքում զարգացումների ցանկացած սցենարի համար Հայաստանը պետք է ունենա գործողությունների ծրագիր:
Անդրադառնալով անցած շաբաթվա ընթացքում արցախա-ադրբեջանական շփման գծում և հայ-ադրբեջանական սահմանին լարվածության աճին, Տավուշում հակառակորդի կողմից զինծառայողի վիրավորմանը, ինչպես նաև Իլհամ Ալիևի հայտարարություններին` նշվեց, որ ՀՀ իշխանությունների համար այս ամենը պետք է հնչի որպես ահազանգ, որ Ադրբեջանը կրկին անցնում է իր սովորական ձեռագրին: Փորձագետի կարծիքով` հայկական կողմերն Ադրբեջանի այս քայլերին համարժեք չեն արձագանքում:
Ինչ վերաբերում է Ղարաբաղյան հակամարտության գոտում գերիների` «բոլորը բոլորի դիմաց» սկզբունքով փոխանակման մասին ՌԴ ԱԳ նախարար Սերգեյ Լավրովի հայտարարությանը, փորձագետը նշեց, որ ՀՀ պատկան մարմինները պետք է ճշգրտեն և հանրայնացնեն Լավրովի հայտարարության տողատակերը: