ԱԺ-ի բակում բողոքի ակցիա է. մասնակիցները պահանջում են խնկարկման արարողությամբ ԱԺ դահլիճը «մաքրել տրանսգենդերի ներկայությունից» (թարմացվող)
17:14
Այս ամենը մենք գնահատում ենք որպես ներքին դիվերսիա և բարոյահոգեբանական արժեհամակարգային ահաբեկչություն, ինչն ակնհայտ շարունակությունն է թուրք-ադրբեջանական ցեղասպան քաղաքականության: Նման հայտարարություն են արել ԱԺ բակում բողոքի ցույց իրականացնողները:
«Մենք պահանջում են ներկայանալ պատգամավորներին, որպեսզի իմանանք՝ որ պատգամավորներն են կրում հայկական մարդկայնության արժեքները և կարող են իրապես լինել ազգի պատգամը ներկայացնողները: Պատգամավորներից պահանջում ենք նաև ընդունել օրենք, որով կարգելվի և քրեորեն կհետապնդվի սեռական կոմնորոշման նախասիրությունների քարոզը և հանրայնացումը ոչ միայն դեռահասների շրջանում, այլ նաև առհասարակ ՀՀ-ում»,-ԱԺ բակում իրենց պահանջները ներկայացնելիս ասացին բողոքի ցույց իրականացնողները:
Նրանք նաև պահանջում են ընդունել մեծամասնության իրավունքների պաշտպանության համար նախատեսված օրենք, որը կբացառի «արտաքին աշխարհից պատվիրված արհեստածին և օտարածին երևույթները»:
16:57
Ազգային ժողովի բակում մի խումբ քաղաքացիներ բողոքի ակցիա են իրականացնում: Մասնակիցները դժգոհում են խորհրդարանում տրանսգենդերի ելույթից և առաջարկում են «մաքրել» դահլիճը:
Հիշեցնենք, որ մարդու իրավունքներին նվիրված լսումների ժամանակ ԱԺ ամբիոնից ելույթ ունեցավ տրանսգենդեր կին: Նրա ելույթից հետո դահլիճում ծափեր հնչեցին: Նիստը վարող, Մարդու իրավունքների և հանրային հարցերի մշտական հանձնաժողովի նախագահ Նաիրա Զոհրաբյանը վրդովված հայտարարեց, որ նրանք իրավունք չունեին օրակարգը խախտել և նման հարց բարձրացնել ԱԺ ամբիոնից:
Հավաքվածները ակցիայի սկզբում հայտարարեցին, որ ակցիան չունի քաղաքական որևէ կողմնորոշում:
Հավաքվածները առաջարկում են, որ ԱԺ նիստերի դահլիճում եկեղեցական կարգով խնկարկման արարողություն կատարվի՝ տրանսգենդերի «ներկայությունից» դահլիճը մաքրելու համար: