Հայաստանի՝ Սիրիա մարդասիրական առաքելություն ուղարկելը մեծ գործ է. Իգոր Մորոզով
ՌԴ Դաշնային խորհրդի անդամ, իրավագիտության և տնտեսական գիտությունների թեկնածու, Ռուսաստանի բնական գիտությունների ակադեմիայի թղթակից անդամ, հատուկ ծառայությունների գնդապետ Իգոր Մորոզովի խոսքով՝ այսօր ռազմական գործողությունների ավարտին` «Իսլամական պետության» վախճանին, Սիրիայի ժողովուրդը զգում է հումանիտար օժանդակության կարիք: Նա նման դիտարկում արեց լրագրողների հետ հանդիպմանը՝ տեսակամրջի միջոցով` խոսելով Հայաստանի՝ Սիրիա մարդասիրական առաքելություն ուղարկելու մասին:
«Ռուսաստանն իր ուսերին է կրում Սիրիային օգնելու բեռը և կոչ է անում իր բոլոր գործընկերներին՝ օգնել Սիրիայի ժողովրդին: Հայ ժողովուրդը կապված է սիրիացիների հետ ավանդական, պատմական կապերով: Այն, որ Հայաստանը միացավ, մարդասիրական առաքելություն ուղարկեց Սիրիա, մեծ գործ է»,- ասաց նա:
Նա նկատեց, որ այսօրվա դրությամբ Սիրիայում մեծ հայկական համայնք է ապրում. Հալեպում, Դամասկոսում և սիրիական այլ քաղաքներում հայ համայնքը ձևավորվել է հարյուրամյակների ընթացքում:
«Մենք ողջունում ենք Հայաստանի կառավարության այդ քայլը, որ ընդունել է հումանիտար օժանդակություն ցուցաբերելու առաջարկը: Դա Ռուսաստանին ուղղված աջակցություն չէ, չնայած մեզ համար շատ կարևոր է, որ մեր գործընկերները ՀԱՊԿ-ում, ԱՊՀ-ում պաշտպանում են մեր արտաքին քաղաքական միջոցառումները, այլ դա օժանդակություն է Սիրիայի ժողովրդին, հայերին, որոնք ավանդաբար ապրում են Սիրիայում, և մենք դրա համար շնորհակալ ենք»,-ասաց նա: