«El şişigi qaytmay, bir qaç parmağı çalışmay». Advokat - ukrain arbiy Sorokanıñ sağlığı içün
Bu hususta onıñ imayecisi, rusiye advokatı Sergey Badamşin Facebook saifesinde yazdı.
Onıñ aytqanına köre, Sorakanıñ daima ağırları bar, Moskovanıñ “Lefortovo” SİZOsında tedaviylev ise, vitamin B aşılavınen bite. Yaqın vaqıtta onı başqa Moskova hastahanesinde baqmalılar.
“Buña baqmadan, keyfi köterinki. Cenk esirleriniñ episi yahşılıqqa ümüt ete, bir birine qol tuta. Deñizcilerniñ episi özüne cenk eserine kibi munasebette olmaqnı talap ete”, - dep qayd etti advokat.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.