საქართველოს ეროვნული ბანკი "თიბისი ბანკის" კონკრეტულ საკითხს ამოწურულად აცხადებს

საქართველოს ეროვნული ბანკი მიესალმება „თიბისი ბანკის“გადაწყვეტილებას სამართლებრივი დავის შეწყვეტის შესახებ და მიიჩნევს, რომ ეს „დადებითად აისახება ბანკის გამჭირვალობაზე და გაზრდის ნდობას ინვესტორთა მხრიდან, რაც საბოლოო ჯამში, პოზიტიურ გავლენას იქონიებს როგორც ბანკის, ასევე ქვეყნის საფინანსო სექტორის განვითარებაზე.“ 


ეროვნული ბანკის განცხადება მის ოფიციალურ ვებსაიტზე გამოქვეყნდა „თიბისი ბანკის“ განცხადებასთან ერთად.


ეროვნული ბანკი „თიბისი ბანკს“ უწოდებს ქვეყანაში და რეგიონში ერთ-ერთი წამყვან ფინანსურ ორგანიზაციას, რომელიც დაკომპლექტებულია მაღალი კვალიფიკაციის აღმასრულებელი მენეჯმენტით და სამეთვალყურეო საბჭოს დამოუკიდებელი წევრებით.


ეროვნული ბანკის განცხადებითვე, „თიბისი ბანკი“ ძლიერი და მდგრადი საკრედიტო ინსტიტუტია და სრულად აკმაყოფილებს ეროვნული ბანკის მიერ დაწესებულ ეკონომიკურ ნორმატივებსა და ლიმიტებს. 


ამასთან, ეროვნული ბანკი აღნიშნავს, რომ კონკრეტულ შემთხვევაში მისი საზედამხედველო ყურადღების საგანი იყო ინტერესთა კონფლიქტის რისკები და ინტერესთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება.


ეროვნული ბანკი აცხადებს, რომ უფლებამოსილების ფარგლებში აგრძელებს მის მიერ მიღებული გადაწყვეტილებების შესრულების მონიტორინგს. 


„ამით ორივე მხრიდან ეს კონკრეტული საკითხი ამოწურულია. მოვუწოდებთ ყველას, თავი შეიკავონ აღნიშნულ თემებზე სპეკულაციებისგან” - ნათქვამია განცხადებაში.


„თიბისი ბანკი“ დღეს დათანხმდა საქართველოს ეროვნული ბანკის მოთხოვნას სამეთვალყურეო საბჭოს შემადგენლობის შეცვლის და მილიონი ლარის ჯარიმის გადახდის შესახებ.


საქართველოს ეროვნულმა ბანკმა 14 თებერვალს გამოაცხადა, რომ ხელმოწერის უფლება შეუჩერა „თიბისი ბანკის“ სამეთვალყურეო საბჭოს თავმჯდომარეს მამუკა ხაზარაძეს და მის მოადგილეს ბადრი ჯაფარიძეს და ბანკის აქციონერთა კრებას მისცა 2 თვიანი ვადა მათი სამეთვალყურეო საბჭოდან გაწვევისთვის.


ეროვნულმა ბანკმა ამ გადაწყვეტილების საფუძვლად დაასახელა „თიბისი ბანკის“ შემოწმებისას დაფიქსირებული, ინტერესთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება. მანამდე ეროვნულმა ბანკმა "თიბისი ბანკი" მილიონი ლარით დააჯარიმა. ორივე გადაწყვეტილება სასამართლოში იყო გასაჩივრებული.


10 წლისწინანდელ ტრანზაქციებს იძიებს პროკურატურა, რომელიც ხაზარაძის და ჯაფარიძის მონაწილეობით უკანონო შემოსავლების ლეგალიზაციის ნიშნებს ხედავს. ორივე მათგანი ამას კატეგორიულად უარყოფს.


21 თებერვალს მამუკა ხაზარაძემ განაცხადა, რომ "თიბისი ბანკიდან" წასვლა გადაწყვიტა.