Смартфон экрани қизнинг кўзини “илма-тешик” қилиб ташлади

Тайванлик қиз икки йил давомида экрани максимал ёрқинликда бўлган смартфондан фойдалангандан кейин кўзига тиклаб бўлмас шикаст етган. Бу ҳақда Kun.uz нашри хабар берди. 2018 йил мартида оролнинг жанубидаги Гаосюн шаҳрида котиба бўлиб ишловчи 25 ёшли Чэнь исмли қиз кўзида кучли оғриқ ҳис қила бошлаган. У оғриқни кўз томчилари билан қолдирмоқчи бўлган, бироқ бу фойда бермаган. Бир неча ойдан кейин оғриқ янада кучайган, қизнинг кўз оқи эса қонга тўлган. Қиз шундан кейин шифокорга мурожаат қилган. Кўрик вақтида қизнинг чап кўзидаги кўриш ўткирлиги 60 фоизга, ўнг кўзидагиси эса 30 фоизга тушиб кетгани айтилган. Шифокорлар қизнинг ўнг кўзи мугуз пардасида 500 та микротешикчани аниқлашган. Улар қизга кўзи гўёки “микротўлқинли печда пишгандек“ кўринишда эканлигини айтишган. Шифокорлар бунга қизнинг мобил телефондан максимал ёрқинликдаги экран ҳолатида фойдаланганини сабаб деб аташган. Қиз телефоннинг созланмаларини қоронғида ишлатганда ҳам ўзгартирмаган. Чэнга стероидлар ва тикловчи процедуралар тайинланган. Қиз ҳамон уларни қабул қилмоқда. Вақт ўтгач унинг кўзи бироз яхшиланган. Бироқ шифокорларнинг айтишича, кўриш қобилиятини тўлиқ тиклаб бўлмайди. Профессор-офтальмолог Хун Цитиннинг таъкидлашича, экрани максимал ёрқин бўлган телефондан 2 соат фойдалангандан кейин кўриш билан муаммолар бошланиши мумкин: “Бунда яқинни яхши кўрмаслик, кўзларнинг қизариши, астенопия, қуруқ кўз синдроми, ачишиш ва кўзда ёт нарса бордек ҳис, сўнгра мугуз парданинг шикастланиши, катаракта ва ретинопатия авж олади”. Шифокорнинг таъкидлашича, қиз билан боғлиқ ҳолатда экраннинг ёруғлиги тавсия қилинган 300 люменда 625 люменни ташкил қилган. Қизнинг кўзи шикастланишига сабабчи телефон маркаси ва модели маълум қилинмаган.