Эш беткәч уйнарга ярый, ди сабыйлар( фотолар)
“Березка” балалар бакчасында бөек шагыйрь Габдулла Тукайның иҗатына багышлап зурлар төркеменә йөрүче балалар белән кичә үткәрелде.
Татар теле тәрбиячеләре Әнисә Зарипова һәм Лилия Хамматова үзенчәлекле бәйрәм программасы төзегәннәр иде. Балалар “Былтыр”, һәм “Су анасы” командаларына бүленеп ярыштылар. Компьютер аша экраннан сорауларга җавап эзләп таптылар. Балалар шагыйрь иҗаты белән таныш, төгәл җаваплар бирделәр. Кызлар “Бишек” җырын оста итеп башкардылар. Аннан “Кызыклы шәкерт”, “Бала белән күбәләк” шигырьләрен рольләргә бүленеп сөйләделәр.
Балалар Тукай кечкенә чагында уйлап тапкан бер уенны да яратып уйнадылар. Залда утыручы урта һәм әзерлек группасына йөрүче балалар да сораулар җавап табып командаларга очко өстәделәр. Соңыннан сүз жюри әгъзаларына - бакча психологы Фәридә Закирова һәм логопед Ләйсән Павловага бирелде. “Ике команда да бик тырыш булды, актив катнаштылар. Бертигез очколар җыйдылар, димәк, дуслык җиңде”,-диде Фәридә Закирова.
Бакчада мондый бәйрәмне ел саен үткәрәләр икән. Ел да төрле формада ясыйлар. Узган ел фольклор кичәсе булса, быел ул уен- викторина рәвешендә узды. Һәр группада Тукай иҗатына багышлап күргәзмәләр ясап куйганнар. “Һәр чарада әти-әниләр бик теләп ярдәм итәләр. Рәсем, кул эшләре ясап алып киләләр. Балаларга шигырьләрен өйрәнергә булышалар”,-ди татар теле тәрбиячесе Лилия Хамматова.
Гөлназ Зарипова.