Туркиянинг машҳур актёрлари президент Эрдўғонга таҳдид қилганликда айбланмоқда
Туркия прокуратураси икки машҳур актёр Метин Акпинар ва Мужат Гезенни президент Режаб Тоййип Эрдўғонни ҳақорат қилганликда ҳамда “давлат тўнтариши уюштиришга чақириш, Эрдўғонни ўлдиришга таҳдид қилиш”да айбламоқда.
23 декабрь куни Истанбул прокуратураси бу икки машҳур актёр сўроқ учун чақиртирилганини маълум қилди.
Метин Акпинар ва Мужат Гезен 21 декабрь куни мухолифатга ён босувчи “Халқ” телеканалидаги ток -шоуда иштирок этган. Шоу пайтда Акпинар Туркия демократик ҳукуматга эга бўлиши керак, акс ҳолда “ҳукумат раҳбарларини осилган, заҳарланган ёки зиндонларда ўлаётган ҳолда кўришимиз мумкин”, деб айтган.
Эрдўғон актёрларнинг бу гапларини ўзига нисбатан ҳақорат деб билишини эълон қилди ва актёрларни “сохта санъаткорлар”, деб атади.
Туркияда 2016 йилда муваффақиятсиз якунланган давлат тўнтаришига уринишдан сўнг, мухолифатга тарафкашликда айбланиб 77 минг одам қўлга олинган. Уларнинг барчаси давлат тўнтаришига уринишга алоқадорликда гумон қилинмоқда.