Պարո՛ն քաղաքապետ, Դուք պետք է արթնանաք և քնեք աղբի նկարներով. Անի Սամսոնյանը կոչ է անում քաղաքապետի էջին աղբի նկարներ ուղարկելու ֆլեշմոբ սկսել (տեսանյութ)
Եկել եմ՝ ձեզ մի քիչ շեղեմ ձեր տոնածառի հանդեսից, դուք խայտառակ եղաք, պարո՛ն Մարության:
Այս մասին Երևանի ավագանու այսօրվա նիստում՝ նոր տոնածառը Երևանին նվիրաբերելու հարցի քննարկմանն իր ելույթում հայտարարեց «Լույս» խմբակցության անդամ Անի Սամսոնյանը:
«3 ամսվա մեր համատեղ աշխատանքի ընթացքում, պետք է նշեմ, որ ակնկալիքները շատ ավելի մեծ են եղել ձեր աշխատանքից, քան իրականությունն է: Այս ընթացքում ծագել են մի շարք սկզբունքային հարցեր, որոնց Դուք այդպես էլ լուծում չեք տվել»,- նշեց նա:
Անի Սամսոնյանը հայտնեց, որ երկու նամակ է գրել քաղաքապետին և երկուսի դեպքում էլ ստացել է անհասկանալի պատասխաններ: Առաջին նամակով նա խնդրել էր համատեղ հանդիպում կազմակերպել կրթության և գիտության նախարարի, իր և այն ուսուցիչների միջև, որոնք անարդարացիորեն նվաստացվել և վիրավորվել են քաղաքապետարանի հանրակրթության վարչության պետից:
«Այս հարցի վերաբերյալ խայտառակ եղան հանրակրթության վարչության պետ Աննա Ստեփանյանը, կրթության փոխնախարարը, խայտառակ եղաք նաև Դուք, պարո՛ն Մարության, որովհետև ես այստեղ ելույթ ունեցա, հարց բարձրացրի, որ Դուք պետք է հեռացնեք այդ անէթիկա պաշտոնյային, բայց նա մինչև հիմա չի հեռացվել: Եվ իմ բերած փաստերին ոչ մի հակափաստարկ չի բերվել: Ինչո՞ւ չեք հեռացնում Աննա Ստեփանյանին»,- ասաց Անի Սամսոնյանը:
Ավագանու անդամի խոսքով՝ քաղաքապետի հայտարարությունները և գործողությունները միմյանց չեն համապատասխանում: Նա նկատեց, որ «Իմ քայլը» դաշինքի նախընտրական ծրագրում տեղ էր գտել աղբահանության երկրորդ օպերատորին ներգրավելու կետը:
««Սանիտեկի» հարցը չի լուծվում: Ես այն եզրահանգմանն եմ գալիս, որ, պարո՛ն քաղաքապետ, Դուք չգիտեք՝ ինչպես լուծել այդ խնդիրը և անկարող եք քաղաքը մաքրել աղբից: Բոլոր քաղաքացիներին կոչ եմ անում ֆլեշմոբ անել: Ձեր անձնական էջին, գործնական էջին ամեն առավոտ, ամեն երեկո ուղարկել աղբի նկարներ: Դուք պետք է արթնանաք և քնեք աղբի նկարներով»,- ասաց Անի Սամսոնյանը: