Ռոմելու Լուկակուն ընտանեկան կորստի պատճառով լքել է «Մանչեսթեր Յունայթեդ»-ի ճամբարը
«Մանչեսթեր Յունայթեդի» հարձակվող Ռոմելու Լուկակուն, ամենայն հավանականությամբ, բաց կթողնի իր թիմի առաջիկա երկու խաղերն ընտանեկան պատճառներով:
Այս շաբաթ բելգիացի ֆուտբոլիստը չի մարզվել «կարմիր սատանաների»` Կերինգթոնում գտնվող բազայում:
Ինչպես հայտնում է Daily Mail-ը, ակումբի ղեկավարների թույլտվությամբ հարձակվողը բացակայում է` ընտանեկան կորստի պատճառով:
25-ամյա բելգիացին դժվար թե վերադառնա Boxing Day-ից շուտ, իսկ դա նշանակում է, որ նա բաց կթողնի ՄՅՈւ-ի նոր գլխավոր մարզիչ Ուլե-Գունար Սուլշերի առաջին երկու խաղերը «Քարդիֆ Սիթիի» և «Հադերսֆիլդի» հետ:
Ամենայն հավանականությամբ, Լուկակուն շարք կվերադառնա դեկտեմբերի 30-ին «Բորնմութի» հետ կայանալիք խաղից առաջ: Ընթացիկ մրցաշրջանում 25-ամյա ֆուտբոլիստն Անգլիայի առաջնության 16 հանդիպման է մասնակցել, որոնցում 6 գոլ է հեղինակել: