Անկախ կառույցի նկատմամբ մեր վերաբերմունքից՝ ՀԱՊԿ-ում մեր պետությունը կորցրեց իր ազդեցությունը. Սուրեն Սարգսյանը՝ գլխավոր քարտուղարի պաշտոնի մասին
ՀՀ-ին չի հաջողվելու պահել ՀԱՊԿ գլխավոր քարտուղարի հաստիքը։ Այսօր լրագրողների հետ զրույցում նման հայտարարություն արեց քաղաքագետ Սուրեն Սարգսյանը։ Նա նշեց, որ չի ցանկանում անդրադառնալ հարցին, թե ինչպես կարելի էր այլ կերպ գործել՝ Յուրի Խաչատուրովի հետ կապված, քանի որ արվածը փոփոխման ենթական չէ։
«Մեզ համար այդ հաստիքն այլևս կորցված է, գոնե այս շրջափուլում, մանավանդ, հաշվի առնելով այն հանգամանքը, որ Բելառուսի ԱԱԽՔ ղեկավարը հանդիպում է պետությունների ղեկավարների հետ, իսկ նրան ընդունում են, ինչը նշանակում է, որ պետությունների ղեկավարների մոտ կա որոշակի դիրքորոշում։ Կարծում եմ՝ կոնսենսուսով է ընտրվելու, այստեղ արդեն ամեն բան կախված է նրանից, թե ՀՀ-ն իր վետոյի իրավունքը կկիրառի Ստանիսլավ Զասի թեկնածության դեմ, թե ոչ։ Հաջորդ տարվա սկզբին ՀԱՊԿ պետությունների ղեկավարների մակարդակով հանդիպում կա, այսինքն՝ կա´մ կերկարաձգվի ՌԴ ներկայացուցիչի պաշտոնավարումը մինչ ժամկետների ավարտը, կա´մ Բելառուսի ներկայացուցիչը կստանա ՀԱՊԿ գլխավոր քարտուղարի պաշտոնը, ինչը, կարծում եմ, կանխատեսելի էր»,- ասաց նա։
Ինչ վերաբերում է հարցին՝ կարելի՞ է սա դիվանագիտական պարտություն համարել, Սուրեն Սարգսյանը նշեց, թե անկախ ՀԱՊԿ կառույցի նկատմամբ ունեցած վերաբերմունքից, պետք է արձանագրել, որ միջազգային կազմակերպությունում պետությունը կորցրեց իր ազդեցությունը։
Մարդկային զարգացման միջազգային կենտրոնի ղեկավար Թևան Պողոսյանն էլ, համաձայնելով Սարգսյանի հետ, հավելեց, որ ՀԱՊԿ գլխավոր քարտուղարի պաշտոնում այլևս «յան»-ով վերջացող ազգանունով մարդ չի լինի։ Սակայն նա հորդորեց սա պարտության դաշտում չդիտարկել, այլ նոր հնարավորությունների արդյունավետ իրացում համարել։