Ռուսաստանցիների 66 տոկոսն ափսոսում է ԽՍՀՄ փլուզման համար. «Լևադա»
Բայց ռուսաստանցիների բավական մեծ տոկոսն, այդ թվում՝ նրանք, ովքեր հետխորհրդային շրջանում են ծնվել, կարոտախտով են խոսում խորհրդային տարիների մասին:
«Լևադա» կենտրոնի անցկացրած հարցախույզի արդյունքների համաձայն, Ռուսաստանի բնակիչների 66 տոկոսն ափսոսում է ԽՍՀՄ փլուզման համար: Դա ամենաբարձր ցուցանիշն է անցած տասը տարում: Ավելի մեծ թվով ռուսաստանցիներ՝ 75 տոկոսը, Խորհրդային Միության փլուզման համար ափսոսանք է հայտնել 2000 թվականին: 2017-ի համեմատությամբ այդ թիվն աճել է 8 տոկոսով: Ռուսների 60 տոկոսը համոզված է, որ ԽՍՀՄ-ը հնարավոր էր պահպանել:
Հարցվածների մեծ մասը 55 տարեկանից բարձր է, բայց, ինչպես «Լևադա» կենտրոնի փորձագետներն են նշում, հետզհետե ավելանում է ԽՍՀՄ փլուզման առիթով ափսոսանք հայտնող նաև 18-ից 24 տարեկան երիտասարդների թիվը:
Որո՞նք են կարոտախտի հիմնական պատճառները. հարցվածների 52 տոկոսը նշել է «միացյալ տնտեսական համակարգի քայքայումը», 36 տոկոսն ասել է, որ ցավ է ապրում «մեծ գերտերության հպատակ լինելու գիտակցումը» կորցնելու համար, 31 տոկոսը նշել է Ռուսաստանում «փոխադարձ անվստահությունն ու համատարած անգթությունը»:
«Լևադա» կենտրոնի վերլուծաբան Կարինա Պիպիան խորհրդային կարգերի հանդեպ կարոտախտի պատճառ է նշել Ռուսաստանում կենսաթոշակի անցնելու տարիքի բարձրացումը:
«Բնակչությունը ԽՍՀՄ փլուզման համար դառնությունը բացատրում է այն ժամանակների հզորության և բարգավաճման մասին թյուր պատկերացումներով, մարդիկ մոռացել են համատարած դեֆիցիտը, մթերք հայթայթելու դժվարությունները, սննդի քարտերը, մանավանդ հիմա, երբ կա մտահոգություն կենսամակարդակի հարցում», - ասել է վերլուծաբանը:
Այս տարվա դեկտեմբերի սկզբին Հանրային կարծիքի հետազոտության համառուսաստանյան կենտրոնի (ВЦИОМ) անցկացրած մեկ այլ հարցախույզի արդյունքների համաձայն, ռուսաստանցիների գրեթե կեսը՝ 49 տոկոսն, առողջության պաշտպանությունն անվանել է սահմանադրությամբ երաշխավորված ամենակարևոր իրավունքներից մեկը:
45, 40 և 36 տոկոսն էլ նշել է համապատասխանաբար՝ կրթության, աշխատանքի և սոցիալական ապահովության իրավունքը:
Ըստ «Լևադա» կենտրոնի վերջին հարցումների, ռուսաստանցիների 47 տոկոսը ենթադրում է, որ երկիրը ճիշտ ճանապարհով է շարժվում, 42 տոկոսը հակառակ կարծիքն է հայտնել, 11 տոկոսն էլ խոստովանել է, որ այդ հարցում չի կարողանում կողմնորոշվել:
Ռուսաստանցիների 66 տոկոսը հավանություն է տալիս նախագահ Վլադիմիր Պուտինի աշխատանքին, 33 տոկոսն այն քննադատում է: