#Liberatecrimea faalleri Estoniyada Kürbedinovğa qoltutuv aktsiyasını ötkerdi
#Liberatecrimea halqara areketiniñ faalleri Rusiniñ Estoniya elçihanesi ögünde Qırımda tevqif etilgen advokat Emil Kürbedinovğa qoltutuv aktsiyasını keçirdi. Bu aqta Qırımtatar Milliy Meclisiniñ azası Eskender Bariyev Facebookta haber etti.
«İrlandiya, Büyük Britaniya, Frenkistan, Poloniya, Avstriya, Latviya, Litvaniya, Estoniya, Lüksemburg, Belçika ve Ukrainadan #Liberatecrimea halqara areketiniñ faalleri Rusiyeniñ Estoniya elçihanesi ögünde canlı zıncırğa tizilip, narazılıq aktsiyasını ötkerdi ve Qırım, qırımlı advokat Emil Kürbedinov, ukrainalı siyasiy mabüsler ve ukrainalı cenk esirleriniñ azat etilmesini talap ettiler!!!», – dep yazdı o.
Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kürbedinovnı 5 künge tevqif etti.
Kürbedinov 2013 senesi Facebookta paylaşqanları içün Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) apiske alındı. Kürbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kürbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Daa soñra jurnalist Anton Naumlük bildirdi ki, Rusiye politsiyasınıñ mayorı Ruslan Şambazov apiske alınğan advokat Emil Kürbedinovnıñ «ekstremizm» yazılarını Facebookta sahte saifeni qullanıp qıdırdı.
Emil Kürbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi. Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı. Mahkeme adise eski olğanına baqmadan, memuriy davanı qapatmaq muracaatını red etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.