Ավտոմեքենաների տեխզննումների չարաշահումների առթիվ հարուցված քրգործերով միայն Երևանում 430 մլն դրամ է վերականգնվել. Ս. Տռուզյան
Ավտոմեքենաների տեխնիկական զննությամբ զբաղվող ընկերությունների թույլ տված առերևույթ չարաշահումների դեպքերի առթիվ ՀՀ քննչական կոմիտեում հարուցված քրեական գործով միայն մայրաքաղաք Երևանում վերականգնվել է ավելի քան 430 մլն դրամ։ Այս մասին Tert.am-ին հայտնեց ՀՀ ՔԿ նախագահի խորհրդական Սոնա Տռուզյանը։
«Առաջիկայում ամփոփ տվյալները կներկայացնենք, այս ոլորտում առերևույթ չարաշահումների աշխարհագրությունը շատ ավելի ընդարձակ է, և գումարի ծավալն ավելի շատ է: Գրեթե բոլոր մարզերում ունենք հարուցված քրեական գործեր, և նմանատիպ գործեր քննվում են նաև մարզերի տարածքային ստորաբաժանումներում: Քննության առաջնային նպատակներից է պատճառված վնասի վերականգնումը, և այդ ուղղությամբ իրականացված հետևողական աշխատանքի արդյունքում միայն Երևանում պատճառված վնասի վերականգնումը կազմում է ավելի քան 430 մլն դրամ»,- ասաց Սոնա Տռուզյանը:
Նշենք, որ ՀՀ տարբեր մարզերում և Երևանում գործող մի շարք ընկերություններ, Տրասնպորտի, կապի և տեղեկատվական տեխնոլոգիաների նախարարությունից ստացած լիցենզիայի հիման վրա իրականացրել են տրանսպորտային միջոցների պարտադիր տեխնիկական զննություն, որի ընթացքում առերևույթ թույլ են տրվել չարաշահումներ՝ պետությանը պատճառելով առանձնապես խոշոր չափերի վնաս։ Նշված դեպքերի առթիվ հարուցվել է 28 քրեական գործ։