2019 թվականը հայկական սպորտում դժվար և ծանր է լինելու. Գաբրիել Ղազարյան
ՀՀ Սպորտի և երիտասարդության հարցերի նախարարությունում կայացավ նախարարի պաշտոնակատար Գաբրիել Ղազարյանի մամուլի ասուլիսը:
Ղազարյանը նշեց, որ 2018թ.-ի մեկնարկից մինչ այժմ բոլոր մարզաձևերից հայ մարզիկները վաստակել են ընդհանուր 173 մեդալ. հավելեց, որ 4 մարզաձևեր դեռևս չեն ավարտել մարզական տարին և մի քանի մեդալների սպասելիքներ դեռ կան:
«2019 թվականը հայկական սպորտում դժվար և ծանր է լինելու: Պատճառն այն է, որ տարին նախաօլիմպիական է: Բացի այդ, 2019 թվականին Մինսկում կայանալու են երկրորդ Եվրոպական խաղերը: Այս պահին ունենք մեկ ուղեգիր թիավարություն մարզաձևից:
Նշեմ նաև, որ Եվրոպական խաղերի 10 մարզաձևերից մասնակիցները կարող են Տոկիո-2020-ի ուղեգրեր նվաճել»,- ասաց Ղազարյանը:
Խոսելով մասսայական սպորտի մասին նախարարի պաշտոնակատարն ասաց, որ շատ ծրագրեր են սպասվում և առաջնայինը բոլոր տարիքային խմբերի անձանց միջոցառումներում ներառելն է:
Գաբրիել Ղազարյանն ասաց, որ ֆեդերացիաներին հատկացվող գումարների ավելացման մասին ծրագիր է ներկայացվել ՀՀ կառավարություն, քանի որ նախաօլիմպիական տարում անելիքները շատ են: Ղազարյանը հույս հայտնեց, որ ֆեդերացիաները գումարները ճիշտ կօգտագործեն:
Այն հարցին, թե ըստ իրեն ով է Հայաստանի տարվա լավագույն մարզիկը, Ղազարյանը տվեց Սիմոն Մարտիրոսյանի անունը:
Խոսելով Արթուր Ալեքսանյանի անվան մարզադպրոցի մասին, նախարարի պաշտոնակատարն հայտնեց, որ ավարտվել են նախահաշվարկային քայլերը: Անդրադարձ եղավ նաև Արթուր Ալեքսանյանի` ԱՄՆ-ում սեփական միջոցներով բուժվելու թեմային: Գաբրիել Ղազարյանն ասաց, որ տեղյակ չի եղել ԱՄՆ Ալեքսանյանի բուժման նպատակով մեկնելու մասին և արտասահմանում բուժում ստանալը մարզիկի կամքն է:
Ղազարյանն անդրադարձավ նաև Հայաստանի բռնցքամարտի ֆեդերացիայի հետ կապված հարցերին և նշեց, որ նախարարությունը որևէ կողմի չի պաշտպանում, այլ կողմնակից է հարցերն օրենքի շրջանակում լուծելու:
2019 թվականին սպասվող Համահայկական խաղերի կազմակերպչական հարցերով ընթանում են քննարկում են: Այս մասին հայտնեց նախարարի պաշտոնակատարը` հավելելով, որ Համահայկական խաղերը կայանալու են Արցախում:
Հայկական սպորտում և ֆուտբոլում կարևորագույն հարցերից մեկի` նախկին «Միկա», ներկայիս ՄԶՀՀԿ ՕԱԿ-ի հարցին Ղազարյանը նույնպես անդրադարձավ. «Մարզահամալիրը 2019 թվականից դառնալու է ՓԲԸ և կարող է համագործակցել ցանկցացած կազմակերպության հետ: Իսկ նախկին «Միկայի» մարզադահլիճի թեմայով, որտեղ ինչպես հայտնի է բասկետբոլի Հայաստանի հավաքականը չի կարող անցկացնել եզրափակիչ փուլի հանդիպումներ, Ղազարյանն ասաց, որ այդ հարցը ևս ուշադրության կենտրոնում է և ծավալվում են քննարկումներ: