Հայտնի թուրք խոհարարը դանակից «կերակրել» է Կադիրովին (տեսանյութ)
Հայտնի թուրք խոհարար Նուսրեթ Գյոքչեն, որը համընդհանուր ճանաչում է ստացել իր մասնակցությամբ վիրուսային տեսանյութի տարածումից հետո, Արաբական Միացյալ Էմիրություններում գտնվող սեփական ռեստորանում ընդունել է Չեչնիայի ղեկավար Ռամզան Կադիրովին ու անձամբ հյուրասիրել նրան իր պատրաստած մսային ուտեստը: Հատկանշական է, որ խոհարարը Կադիրովին «կերակրել» է անմիջապես դանակի ծայրից:
Համացանցում տարածված տեսանյութում երևում է՝ ինչպես է Գյոքչեն կտրում մատուցված միսը, իրեն հատուկ ձևով աղ ցանում դրա վրա, և ուտեստի մի կտորը դանակի ծայրով մոտեցնում Կադիրովին, որն էլ ուտում է միսը:
Չեչնիայի ղեկավարը հեռախոսով նկարահանել է «շոուի» ամբողջ ընթացքը:
Համացանցի միջոցով հայտնի դարձած և Salt Bae մականունը ստացած թուրք խոհարարն իր ռեստորաններն ունի Ստամբուլում, Դուբայում, Մայամիում, Նյու Յորքում և այլ մեծ քաղաքներում: Նրա ռեստորաններ են այցելել բազմաթիվ հայտնի մարդիկ՝ Վենեսուելայի նախագահ Նիկոլաս Մադուրոն, ֆուտբոլիստ Դևիդ Բեքհեմն ու հոլիվուդյան դերասան Լեոնարդո դի Կապրիոն: Բոլոր պատվավոր հյուրերին Նուսրեթ Գյոքչեն սպասարկում է անձամբ: