Ես և իմ գործընկերները զբաղված ենք ավելի կարևոր խնդիրներով, քան իրար մեջ առաջինը լինելու համար կռիվ մղելը. Մեսրոպ Պապիկյան
Մի՛ փորձեք սև կատուներ նետել այնտեղ, որտեղ դրանք լինել չեն կարող: Այս մասին ֆեյսբուքյան իր էջում գրել է ՀՀ վարչապետի խորհրդական, թիվ 1 ընտրատարածքում «Իմ քայլը» դաշինքից առաջադրված Մեսրոպ Պապիկյանը՝ անդրադառնալով մամուլում հրապարակված այն տեղեկությանը, որ իրենց ընտրատարածքում առաջադրված 13 թեկնածուներից մեկն իբրև թե «դաբրո» ունի, մեկի հորեղբայրն էլ զբաղված է եղբոր որդու համար ձայներ հավաքելով:
«Անցել է «դաբրոներով» կամ խնամիաբարեկամական կապերով ձայներ կորզելու ժամանակը: Այդ արատավոր երևույթները չեն կարող տեղ ունենալ «Իմ քայլը» դաշինքում: Եթե ձեր կուսակցություններում շարունակում եք թաղային մարտեր անցկացնել, իրար մեջ ընտրատարածքի չեմպիոնին փնտրել, դա ձեր գործն է, մի՛ պրոյեկտեք այն մեզ վրա:
Հավանաբար զբաղված եք եղել կամ հիմա էլ զբաղվում եք ձայներ որսալու գործընթացով ու լավ գիտեք, թե այդ ճանապարհին «դաբրոն» ինչ ազդեցություն ունի»,- գրել է Մ. Պապիկյանը:
Նա խորհուրդ է տվել գնահատել ժամանակը: «Ես և իմ գործընկերները զբաղված ենք ավելի կարևոր, ավելի խորքային խնդիրներով, քան իրար մեջ առաջինը լինելու համար կռիվ մղելը»,- գրել է պատգամավորի թեկնածուն:
Հիշեցնենք, որ «Փաստ» թերթը գրել էր, որ իրենց հասած տեղեկություններով՝ թեկնածուներից մեկի՝ Կարեն Չիլինգարյանի հորեղբայրը «Իմ քայլը» դաշինքի տարածքային շտաբի պետն է ու իր ողջ ջանքերը ուղղում է բացառապես եղբոր որդու համար ձայներ ապահովելուն, չնայած որպես շտաբի պետ պատասխանատու է ռեյտինգային բոլոր թեկնածուների ու ընդհանրապես դաշինքի քարոզչության ու քվեների համար:
«Միևնույն ժամանակ նույն այդ տարածքում առաջադրված մեկ այլ թեկնածու՝ Սփյուռքի երիտասարդ նախարար Մխիթար Հայրապետյանը, իր մրցակից–ցուցակակիցներին հասկացրել է, որ ինքն ունի Նիկոլ Փաշինյանի «դաբրոն», ուստի մյուսները թող շատ «պատեպատ չտան» իրենց»,- գրել էր թերթը: