Тожикистон вазири Хўжанддаги қамоқхонада чиққан исён ҳақида биринчи марта расмий баёнот берди
Бу Тожикистон ҳукуматининг Сўғд вилоятида 7 ноябрда содир бўлган воқеа юзасидан биринчи расмий баёноти бўлди. Шу кунга қадар ҳукумат бу борада сукут сақлаб келаётган эди.
22 ноябрь куни Брюсселда «Марказий Осиё – Европа Иттифоқи» доирасидаги кенгашдан сўнг ўтказилган матбуот анжуманида Сирожиддин Муҳриддин маҳбуслар қўриқчиларга ҳужум қилгани, икки зобитни ўлдириб, яна беш нафарини яралаганини айтди.
-Зобитлар маҳбуслар билан музокара ўтказмоқчи бўлган. Бироқ исён кўтарганлар уларга қаршилик қилган,- деди Муҳриддин.
Аввалроқ мустақил манбалар бу воқеада камида 50 одам ҳалок бўлгани тўғрисида хабар берган эдилар.
Озодлик радиоси тожик хизмати Тожикистон ҳуқуқ-тартибот идораларидан бирининг мулозимига таяниб, исённи "Ислом давлати" террор гуруҳи жангарилари уюштирганини хабар қилган.
"Ислом давлати" террор гуруҳининг маълум қилишича, исён унинг "аскарларидан бири" томонидан амалга оширилган.