Петербургда Сурияга кетишни ният қилган ўзбекистонлик қўлга олингани иддао қилинди
Бу ҳақда Регнум агентлиги Петербург Ички ишлар бош бошқармасига таянган ҳолда хабар берди. Айтилишича, ўзбекистонлик полиция ва Федерал хавфсизлик хизмати ҳамкорликда ўтказган амалиёт пайтида ушланган.
Хабарда Жасурбек Йўлдошев Россияда тақиқланган террорчи ташкилотлар билан алоқда бўлгани ва уларнинг фаолиятида иштирок этишни режалаштираётгани иддао қилинган.
“Тергов маълумотларига қараганда, қўлга олинган шахс Telegram ва WhatsApp мессенжерлари воситасида хорижий тиллардан бирида тақиқланган ташкилотлар вакиллари билан бир неча ой мобайнида фаол ёзишиб турган ва халқаро террорчиларга қўшилиш учун Украина орқали Сурияга чиқиб кетишни режалаштирилган”, - дейилади хабарда.
Маълум қилинишича, ўзбекистонлик Россиядан депортация қилиниш учун хориж фуқароларини вақтинча сақлаш марказига олиб келинган пайтда унинг ёзишмалари фош бўлиб қолган. Шундан сўнг у қўлга олинган.