Rusiye FSBsi hadimleri çarşenbe künü, noyabrniñ 21-nde, Eski Qırım sakini, qırımtatar faali İsmet Memetovnıñ evinde tintüv keçirdi. Bunıñ sebebi «Meclis faaliyetinen alâqaları bar olğanına dair» şübeler oldı. FSB malümatına köre, Memetov Meclisni maliye ete ve «ekstremist edebiyatnı saqlay». Haber etile ki, advokat mahkeme qararı olmağanı içün evniñ baqılmasına qarşı çıqtı. Buña baqmadan, Rusiye uquq qoruyıcı organlarınıñ hadimleri İsmet Memetovğa ait binalarnı baqıp çıqtı: eki tehnik baquv stantsiyası, tükân, qave, soñra da ev. Rusiye uquq qoruyıcıları Eski Qırım sakininiñ evinde keçirgen tahqiqat tedbirleri vaqtında bir şey tapmadı ve almadılar. İsmet Memetov oña aydınlatılğan qabaatlarnen razı degil ve yapılğan basqınıñ siyasiy mabüslerniñ mahkemelerine faal qatnağanınen bağlı olğanını tüşüne. (Video – «Qırım birdemligi»)
