Çubarov, FSBniñ Eski Qırımda keçirgen tintüvini izaatladı
«Bu (Meclis faaliyetinen alâqaları bar olğanına dair şübeler – QA) tintüv keçirmek içün bir manaçıqtır. Bu insannı qomşuları ürmet ete. Oña yaqın olğan insanlarnıñ mahkemelerine barğandır, bu qadar. Rusiye işğalcileriniñ qırımtatar evlerine kelip taqdim etken er angi qabaatlar qırımtatarlarğa qarşı basqı yapmaq içün qullanıla», – dedi Çubarov.
Noyabrniñ 21-nde Rusiye FSBsi hadimleri Eski Qırım sakini, qırımtatar faali İsmet Memetovnıñ evinde tintüv keçire, dep bildire «Qırım birdemligi».
Memetov Rusiyede ve onıñ işğali altındaki Qırımda yasaqlanğan Qırımtatar Milliy Meclisiniñ faaliyetinen alâqaları bar olğanında şeklene. FSB malümatına köre, Memetov Meclisni maliye ete ve «ekstremist edebiyatnı saqlay».
İsmet Memetov oña aydınlatılğan qabaatlarnen razı degil ve yapılğan basqınıñ siyasiy mabüslerniñ mahkemelerine faal qatnağanınen bağlı olğanını tüşüne.
Rusiye uquq qoruyıcıları Eski Qırımdaki tintüvlerni izaatlamay.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.