55-მდე გაიზარდა ავღანეთში სასულიერო პირებზე თავდასხმის შედეგად დაღუპულების რიცხვი
მსხვერპლს შორის არიან მუსლიმი სწავლულები მთელი ავღანეთიდან. ისინი ქაბულში მიიწვია „ულემას საბჭომ“ 20 ნოემბერს წინასწარმეტყველ მუჰამედის დაბადების დღის აღსანიშნავად. გამომძიებელთა ჯგუფის წევრმა 21 ნოემბერს განაცხადა, რომ ჯერ უცნობია, ექსტრემისტების რომელი ორგანიზაცია დგას თავდასხმის უკან.
„ულემას საბჭომ“ - ავღანეთის უდიდესმა ორგანიზაციამ - სუნიტი სწავლულები შეკრიბა. მართალია, თალიბებიც და „ისლამური სახელმწიფოს“ წევრი ექსტრემისტებიც სუნიტები არიან, მათ ბევრჯერ მოუწყვიათ თავდასხმები ავღანეთის მთავრობის მოკავშირე რელიგიურ მოღვაწეებთან. მაგრამ თალიბანმა მალევე უარყო კავშირი თავდასხმასთან. თალიბანის წარმომადგენელმა 20 ნოემბერს გამოაცხადა, რომ მისი ჯგუფი გმობს თავდასხმებს სამოქალაქო პირებსა და რელიგიურ მოღვაწეებზე.