«Ўзбекконцерт» Чеченистон халқ артистининг соқоли туфайли саҳнага кўтарилишига рухсат бермади

«Ўзбекконцерт» “Чеченистон халқ артисти” унвонини олган ўзбек хонандаси Санжар Жавбердиевнинг соқоли туфайли унга концерт фаолиятини юритиш учун лицензия беришдан бош тортди. Артист бу ҳақда «Газете.uz»га берган интервьюсида гапириб берган. Sun Jay таҳаллуси билан қўшиқ куйлайдиган Жавбердиев икки ойдан бери “Ўзбекконцерт”дан лицензия ололмаётганини айтади. Мулозимларнинг фикрича, бунга унинг ташқи кўриниши сабаб бўлган. Қўшиқчининг концерт директори ташкилотнинг раҳбари Одил Абдуқаҳҳоров билан учрашган ва ундан кескин ультиматум олган: Жавбердиев соқолини олиши керак, йўқса унга лицензия берилмайди. «Менга соқолим борлиги ёшларга ёмон таъсир кўрсатишини айтишди. Қандай қилиб? Нега у ҳолда бутун шаҳар бўйлаб соқоли бор Амир Темур, Алишер Навоий каби буюк бобокалонларимизнинг ҳайкал ва портретлари мавжуд? Менга соқол билан қўшиқ айтишни тақиқловчи ҳужжатни кўрсатишмади», — дейди Жавбердиев. У мисол тариқасида Тошкентдаги рэпер Тиматининг соқолдаги афишасини келтиради. Артист Ўзбекистон президентига видеомурожаат қилиб, мазкур воқеага ойдинлик киритиб беришни сўрайди. Жавбердиев сўзларига кўра, у Мирзиёевнинг юртдошларни ватанга чорловидан сўнг қайтган. «40 дан ортиқ ўзбек тилида қўшиқларим бор. Ўзбек тилидаги қўшиқлар Америка, Европа ва бошқа жойларда тараннум этилишини хоҳлайман. Нега биз тинчгина ижод қиломаймиз, нега бизларни бир қолипга киритишга уринишади?» — дейди хонанда. “Ўзбекконцерт” билан масала ҳал этилгунча хонанда интернет орқали ишлашга бел боғлаган. «Ўзбекконцерт» раҳбари нашрнинг соқол борасидаги саволига жавоб бермади ва хонанда экспертлар гуруҳидан иборат Кенгашнинг навбатдаги мажлисига таклиф қилинишини айтди. «Мажлисга соқоли билан келаверсин. Лицензия бериш-бермасликни комиссия ҳал қилади», — дейди Абдукаҳҳоров. «Ўзбекконцерт» республикада артистлар фаолиятини кескин назорат қилади ва миллий менталитет ва “шарқона одоб-аҳлоқ” тушунчалари билан кўпинча хонандаларни лицензиядан маҳрум қилади. Бундан бир ҳафта олдин ташкилот қўшиқчи Шаҳло Аҳмедованинг лицензиясини бекор қилди. Бунга қўшиқ клипидаги йигит ва қизнинг беҳаё ҳолатда тасвирлангани сабаб бўлган. Июнда «Ўзбекконцерт» ёшларнинг маънавий тарбиясига бағишланган мажлисга келмагани учун тўртта хонанданинг лицензиясини бекор қилган. Айрим кузатувчиларнинг фикрича, «Ўзбекконцерт» ташкилоти лицензиядан маҳрум қилиш ҳуқуқидан фойдаланиб айрим артистларни расмий ёки оилавий тадбирларда иштирок этишга мажбур қилади. Масалан, бундан бир ҳафта олдин “Дизайн” гуруҳи давлат томонидан уюштирилган тадбирларда қатнашганидан сўнг лицензияси қайтариб берилганини Turon24 нашрига айтган. Шунга қарамасдан Upl.uz маълум қилишича, Абдукаҳҳоров “Ўзбекконцерт” саъй-ҳаракатлари маънавитяни тиклаш, ёшларни ёмон унсурлардан қайтаришга қаратилганини айтади. У клип ва қўшиқларни баҳоловчи комиссия томонидан 162 тадан 32 тасига тақиқ қўйилганини таъкидлайди. «Кўпчилик буни цензура деб атайди, мен бундай ҳисобламайман. Биз учун ёшлар маънавиятини сақлаб қолиш -муҳим вазифадир», — дейди «Ўзбекконцерт» раҳбари. “Фарғона” халқаро ахборот агентлиги