Мадумаров: биздикилерге түштөн кийин акыл кирет
- Атамбаевдин берген интервьюсу боюнча, "кечиккен махабат" деген түшүнүк бар го. Бул өтө кечиккен өкүнүч. Кээ бир жерлерин туура айтып жатат. Бирок ошол туура айткан жерлерин бир жарым жыл премьер-министр, алты жыл президент - жалпысынан жети жарым жыл бийликте отурганда жасап коюшу керек эле. "Менин командамды соту жок камап койду" деп атпайбы. Ал нерсе мурда да болуп келген. Мына, "көптөгөн суроолорго жооп берилбей жатат" деп атпайбы. Ал кезде да жооп берилген эмес. Кезинде мен өз колум менен жазып, 2011-15-17-жылдардагы шайлоолордогу ар бир мыйзам бузуу фактыларын дискке көчүрүп бергем. Кыргызстандагы мыйзам бузуу боюнча фактылар менен дискти Сапар Исаковдун колуна тапшыргам. Бирок жооп берген жок да! "Туура" деп да, "туура эмес" деп да айткан жок. Бүгүн эми ушундай абалга кептелдик. Биздикилердин акылы түштөн кийин кирет.
Экс-президент Алмазбек Атамбаев 19-ноябрда "Апрель ТВ" каналына маек куруп, азыркы бийликти "Бакиевдин жолуна түштү" деп айыптады. Ошондой эле Өмүрбек Текебаевдин камалышы жана журналисттер менен соттошуу жаатындагы суроолорго да жооп берип, "андай кылбасам деле болмок" деген таризде жооп берген.
Сооронбай Жээнбековдун командасы жана президенттин аппараты Атамбаевдин билдирүүлөрүнө азырынча комментарий бере элек. (NT)