Մակեդոնիան նախկին վարչապետ Գրուևսկիի արտահանձնման համար դիմել է Հունգարիային
Մակեդոնիայի արդարադատության նախարարությունը հայտարարել է, որ դիմումը ուղարկել են նոյեմբերի 20-ին այն բանից հետո, երբ Հունգարական իշխանամետ Magyar Idok թերթը գրել է, որ Գրուևսկին ապաստան է ստացել, քանի որ իշխանությունները եզրակացրել են, որ հայրենիք վերադառնալու դեպքում նա կարող է քաղաքական հետապնդման ենթարկվել:
Գրուևսկին, ով այս ամսվա սկզբին Հունգարիա էր փախել ազատազրկումից խուսափելու համար, «Ֆեյսբուքում» գրել է, որ Հունգարիան «դրական է արձագանքել» քաղաքական ապաստան ստանալու իր խնդրանքին` նշելով, թե «Մակեդոնիայի նոր կառավարությունը Սոցիալ-դեմոկրատների ղեկավարությամբ հետապնդում է կազմակերպել քաղաքական դրդապատճառներով»:
Նա նաև ասել է, որ եթե հայտնվի Մակեդոնիայի բանտում, նրա կյանքը վտանգված կլինի, քանի որ լսել է իրեն սպանելու դավադրության մասին։
Նիկոլա Գրուևսկին հեռակա կարգով մեղադրվում է կոռուպցիայի մեջ և դատապարտվել երկու տարվա ազատազրկման:
Հունգարիայի պաշտոնյաները չեն հաստատել, որ ապաստան են տրամադրել 48-ամյա քաղաքական գործչին: